لاہور ( این این آئی) پاکستان کرکٹ ٹیم کے نائب کپتان شاداب خان نے کہا ہے کہ ون ڈے کی نمبر ون رینکنگ چھن جانے کا افسوس ہے مگر ورلڈ کپ کے لئے رینکنگ اہم نہیں ہوتی۔ انہوں نے ایک انٹرویو کے دوران کہا کہ نیوزی لینڈ کے خلاف سیریز سے ورلڈ کپ کی تیاری کا اچھا موقع ملا، مڈل آڈر بیٹنگ اور مڈل اوور میں بولنگ میں بہتری لانے کی ضرورت ہے۔
ورلڈ کپ سے قبل یہ دونوں کمزوریاں دور کرنی ہوں گی، فیلڈنگ میں بھی بہتری کی گنجائش ہے، ٹی ٹونٹی زیادہ کھیلنے کی وجہ سے ون ڈے میچز میں فیلڈنگ کے دوران کبھی کبھی انرجی لیول کم ہو جاتا ہے، مڈل اوور میں ان کا کام وکٹیں لینا ہے جس میں انہیں زیادہ کامیابی نہیں ملی۔شاداب خان نے کہا ہک ٹیم میں ان آئوٹ سے کارکردگی میں فرق پڑتا ہے، سیریز میں روٹیشن پالیسی کے تحت نئے کھلاڑیوں کو موقع دیا گیا، ورلڈ کپ میں سب ٹیمیں میدان میں اترتی ہیں تو صفر پر ہوتی ہیں، ورلڈ کپ کی تیاری کے لیے زیادہ میچز نہیں ملے۔نائب کپتان نے کہا کہ کم ون ڈے میچز کی وجہ سے کائونٹی کرکٹ کھیلنے جا رہا ہوں، کائونٹی میں فور ڈے کرکٹ ملے گی لیکن کھیل میں بہتری آئے گی۔کم میچز ملنے کے باوجود کوشش کریں گے کہ ورلڈ کپ کے لیے خود کو تیار رکھیں، نیوزی لینڈ کے خلاف آخری ون ڈے میں اچھی کرکٹ ہوئی۔
