کراچی (این این آئی)پاکستانی اداکارہ ارمینا رانا خان کے شوہر فیصل رضا خان نے ٹوئٹر پر(ن)لیگ کے سوشل میڈیا اکائونٹ سے اپنی اہلیہ اور بیٹی کی تصویر پوسٹ کرنے پر پارٹی سے معافی کا مطالبہ کردیا۔ارمینا کے شوہر کے علاوہ اداکار عثمان خالد بٹ اور کئی سوشل میڈیا صارفین نے بھی(ن)لیگ کے سوشل میڈیا اکانٹ سے اداکارہ کی تصویر ڈیلیٹ کرنے کا مطالبہ کیا ہے۔اداکارہ کے شوہر فیصل رضا نے اپنی ٹوئٹ میں کہا ن لیگ کی قیادت، آپ اس اکائونٹ کے ذمہ دار ہیں، آپ نے میری اہلیہ کو ٹرول کرنے کیلئے میری نوزائیدہ بیٹی کی تصویر پوسٹ کردی، آپ لوگوں نے شرافت کی تمام حدود پار کردی ہیں۔انہوں نے لکھا میری بیٹی اور مجھے پاکستان کی سیاست میں کوئی دلچسپی نہیں ہے لیکن ایک باپ کی حیثیت سے میں اپنے بچے کی حفاظت کروں گا، اپنے اس عمل پر فوری طور پر معافی مانگیں۔کچھ دیگر افراد نے بھی مذکورہ تصویر فوری ڈیلیٹ کرنے کا کہا۔