اسلام آباد (این این آئی)مریم نواز اور شہباز شریف کی عدالتوں سے بریت کے خلاف نیب کی جانب سے سپریم کورٹ میں اپیل دائر کرنے سے گریز کے معاملہ پر پاکستان تحریک انصاف نے اس معاملے میں فریق بننے کا فیصلہ کر لیا،تحریک انصاف کے مرکزی ایڈیشنل سیکرٹری جنرل سینیٹر اعظم خان سواتی کی جانب سے
سپریم کورٹ آف پاکستان میں باضابطہ درخواست دائر کر دی گئی ۔عدالت عظمیٰ سے پاکستان تحریک انصاف کو معاملے میں فریق بننے کی اجازت کے حصول کی استدعا کر دی ۔ سینیٹر اعظم سواتی نے کہاکہ امپورٹڈ سرکار نے رجیم چینج کے بعد سب سے پہلا وار نیب پر کیا، نیب قانون میں ترمیم اور اس کے لر کاٹنے کا بنیادی مقصد اربوں روپوں کی چوری پر پکڑ سے نجات حاصل کرنا تھا۔ انہوںنے کہاکہ شریفوں کی بے جا مداخلت اور دبائو کے باعث نیب کے چئیرمین اپنے عہدوں سے مستعفی ہو چکے ہیں۔ اعظم سواتی نے کہاکہ نیب کی جانب سے مریم نواز اود شہباز شریف کی بریت کے فیصلوں کے خلاف اپیلوں سے گریز کی ضرب قومی مفادات پر پڑتی ہے۔ انہوںنے کہاکہ تحریک انصاف قوم کا لوٹا گیا مال ہضم کرنے کی کسی صورت اجازت نہیں دے گی۔ اعظم سواتی نے کہا کہ چنانچہ تحریک انصاف نے معاملے میں فریق بننے کے لئے باضابطہ طور پر عدالتوں سے رجوع کر لیا ہے۔ انہوںنے کہاکہ عدالت سے ملتمس ہے کہ اس اہم ترین معاملے میں وفاق پاکستان میں عوام کی نمائندہ سب سے بڑی جماعت کو معاملے میں فریق بننے کی اجازت دی جائے۔
