لاہور( آن لائن) پاکستان مسلم لیگ ن کے قائد نواز شریف اور چیف آرگنائزر مریم نواز شریف نے پرویز الٰہی کی کامیابی پر پارٹی کی صوبائی قیادت پر شدید برہمی کا اظہارکرتے ہوئے معاملے کی فوری رپورٹ طلب کر لی ۔نجی ٹی وی کے مطابق مسلم لیگ ن کے قا ئد نواز شریف

اور چیف آرگنائزرمریم نواز نے پرویز الٰہی کی دوبارہ وزیراعلیٰ پنجاب کی کامیابی پر صوبائی قیادت سے استفسار کیا کہ پارٹی قیادت کو آگاہ کیا گیا تھا کہ تحریک انصاف کے کم از کم 7 ناراض اراکین پی ڈی ایم سے رابطوں میں ہیں، ناراض اراکین کیسے ووٹنگ کے لئے پہنچ گئے، انہیں مینیج کیوں نہیں کیا جا سکا۔پارٹی ذرائع کے مطابق نواز شریف نے معاملے پر فوری رپورٹ طلب کر لی جبکہ رانا ثناء اللہ نے نواز شریف اور مریم نواز کو معاملے پر ابتدائی رپورٹ پیش کرتے ہوئے مریم نواز کی فوری وطن واپسی کی تجویز دی اورکہا کہ مریم نواز فوری وطن واپس نہیں آتیں تو پارٹی کو نقصان ہو سکتا ہے۔صوبائی قیادت نے موقف اپنایا کہ سپیکر نے گنتی میں قواعد کی خلاف ورزی کی،ہماری گنتی کے مطابق ایوان میں 183 اراکین تھے ،بسمہ ریاض،شمسہ ،وسیم بادوزئی ،دوست محمد مزاری مسعود الرحمن ، مومنہ وحید ،خرم لغاری ،فاطمہ چوہدری ایوان میں موجود نہ تھے،جس پر نواز شریف کا کہنا تھا کہ اگر 183 اراکین تھے تو گنتی چیلنج کیوں نہ کی،بائیکاٹ کیوں کیا،صوبائی رہنما نواز شریف کو ٹھوس جواب نہ دے سکے ۔

موضوعات:(ن) لیگ