لاہور( این این آئی)ترجمان پنجاب حکومت مسرت جمشید چیمہ نے کہا ہے کہ وزیر اعظم عمران خان نے مشکل کی اس گھڑی میں سیاست کی بجائے ملک و قوم کے مفاد کو ترجیح دیتے ہوئے غیر معمولی فیصلے کئے ہیں ،جہاں بھی کورونا کیسز کی تعداد بڑھے گی اس علاقے کو فوری سیل کر دیا جائے گا ، وفاق کے تحت پنجاب میں 30لاکھ افراد میں 37.1ارب روپے کی خطیر رقم تقسیم کی جا چکی ہے ،

مسلم لیگ (ن) اور پیپلز پارٹی سیاست پراپیگنڈے اور جھوٹے الزامات کی کمزور بیساکھیوں کے سہارے کھڑی ہے ۔ میڈیا کیلئے جاری کئے گئے اپنے ویڈیو بیان میں ترجمان پنجاب حکومت مسرت جمشید چیمہ نے کہا کہ حکومت نے مختلف طبقات کی مشکلات کو مد نظر رکھتے ہوئے لاک ڈائون میں نرمی کا فیصلہ کیا ہے اس لئے عوام سے اپیل ہے کہ کورونا وائرس سے بچائو کیلئے ایس او پیز پر مکمل عملدرآمد کریں ،اگر خدانخواستہ کورونا کیسز کی تعداد میں اضافہ ہوتا ہے تو حکومت کو لاک ڈائون میں نرمی اور کاروبار کھولنے کی اجازت دینے کے فیصلے پر نظر ثانی کرنا پڑے گی ۔ انہوں نے بتایا کہ پنجاب حکومت نے کورونا وائرس کے ایک لاکھ مریضوں کیلئے انتظامات کر رکھے ہیں اور اس تعداد میں اضافہ کیا جارہا ہے ،صوبے میں طبی عملے کیلئے حفاظتی کٹس کی کوئی کمی نہیں اور ان کی خدمات کے اعتراف میں انہیں مراعات دی جارہی ہیں۔ کورونا وائرس کی وباء تھمنے کے بعد فرنٹ لائن پر لڑنے والے طبی عملے کو تحسین پیش کرنے کے لئے تقاریب کا انعقاد کیا جائے گا ۔ترجمان پنجاب حکومت مسرت جمشید چیمہ نے کہا کہ مسلم لیگ (ن) نے موجودہ حالات میں پراپیگنڈے جبکہ پیپلز پارٹی نے وفاق پر بے بنیاد الزامات عائد کرنے کی سیاست کی جو قابل مذمت ہے لیکن عوام نے دونوں کے منفی کردار کو یکسر مسترد کردیا ہے ۔

موضوعات:ترجمان پنجاب حکومت