شکار پور(آن لائن) شکار پور میں والدین نے 10 سالہ بچی کی شادی 45 سال کے شخص سے کر دی۔والد نے ڈھائی لاکھ کے عوض اپنی 10 سالہ بچی کو فروخت کر دیا۔اس حوالے سے میڈیا رپورٹس میں بتایا گیا ہے کہ شکارپور میں بچی کی رخصتی کی ویڈیو جیسے ہی سوشل میڈیا پر وائرل ہوئی تو پولیس نے چھاپہ مار کر دولہے کو حراست میں لے لیا۔معصوم بچی تھانے میں دادی سے لپٹ کر رونے لگی۔

مقامی ذرائع کا کہنا ہے کہ والد نے کم سن بچی کا نکاح 4 سال پہلے کروایا تھا۔اب اس کی عمر دس سال ہے تو رخصتی کر رہے تھے،جب کہ دولہا نے کہا کہ مجھ سے بچی کے والد نے ڈھائی لاکھ روپے لیے تھے۔اسی حوالے سے ایک رپورٹ میں بتایا گیا ہے کہ پولیس نے 45 سالہ شخص کی 10 سالہ بچی کے ساتھ زبردستی شادی کی کوشش ناکام بناتے ہوئے ملزمان کو گرفتار کرلیا۔یہ واقعہ شکار پور کی تحصیل خانپور کے نواحی گاں مھرو ماڑی میں پیش آیا، جس میں رخصتی سے قبل پولیس نے کارروائی کرتے ہوئے دولہے اور دولہن کو گرفتار کرلیا۔پولیس کی جانب سے گرفتار کیے گئے 45 سالہ شخص کی شناخت محمد سومر جبکہ 10 سالہ لڑکی کی شناخت ملوکان شیخ کے نام سے ہوئی ہے، ملزم پر 10 سالہ لڑکی سے زبردستی شادی کرنے کا الزام ہے۔ پولیس کے مطابق10 سالہ بچی کے ساتھ زبردستی نکاح پڑھایا گیا تھا جس کی اطلاع ملنے پر رخصتی سے قبل کارروائی کرتے ہوئے دولہے اور دولہن کو گرفتار کرلیا۔ گرفتاری کے بعد دولہے کو نیو فوجداری تھانہ منتقل کیا گیا ہے جبکہ 10 سالہ لڑکی کو وومین کمپلین سیل شکارپور منتقل کردیا گیا۔پولیس نے بتایا کہ دولہن کے والد اور نکاح خواہ پولیس کارروائی کے موقع پر فرار ہوگئے تھے، جنہیں بعد ازاں گرفتار کرلیا گیا۔جب کہ دولہا بھی پولیس کے زیر حراست ہے۔

موضوعات:10 سالہ بچی کی شادی