لاہور (آئی ا ین پی) بھارت کے ہائی کمشنر اجے بساریہ نے کہا ہے کہ پاکستان اور بھارت میں سفارتکار پیدل گھوم سکتے ہیں‘ ستر سال سے اپنائی گئی پالیسی کسی کے لئے فائدہ مند نہیں ہے‘ مشکلات کے باوجود تجارت بڑھانے پر بات کرنے کی ضرورت ہے‘ غربت‘ پسماندگی اور ناخواندگی دونوں ممالک کے مسائل ہیں۔ جمعہ کو بھارت کے ہائی کمشنر اجے بساریہ نے لاہور چیمبر آف کامرس کے تاجرون سے ملاقات کی۔

جمعہ کو پاکستان میں تعینات نئے بھارتی ہائی کمشنر اجے بساریا نے لاہور چیمبر کا دورہ کیا جہاں انہوں نے صنعت کاروں اور تاجروں سے ملاقات کی۔اس موقع پر لاہور چیمبر کے صنعت کاروں نے بھارتی ہائی کمشنر سے شکوہ کیا کہ تاجروں اور عام لوگوں کو ویزوں کا اجرا مشکل ہو گیاہے، عوام اور تجارت کا راستہ روکنا دونوں ملکوں کے مفاد میں نہیں ہے لہذا راستے کھولے جائیں اورسفر آسان کیا جائے۔تاجروں نے بھارتی ہائی کمشنر سے کہا کہ بھارتی حکومت کا رویہ بہتر نہیں اس میں تبدیلی کی ضرورت ہے۔بھارتی ہائی کمشنر نے تاجروں سے گفتگو کرتے ہوئے کہا کہ میں کل پہلی مرتبہ لاہور پہنچا ہوں یہ کہاوت سچ ہے کہ جس نے لاہور نہیں دیکھا اس نے کچھ نہیں دیکھا۔ پاکستان اور بھارت میں سفارتکار پیدل گھوم سکتے ہیں لیکن ویزے کا حصول بڑا مسئلہ ہے۔ کوشش کروں گا کہ تاجروں کو زیادہ ویز ے جاری ہوں، ایک دوسرے سے تجارت کو فروغ ہی مقصد ہونا چاہیے۔اجے بساریا نے کہا کہ پاکستان اور بھارت ہمسائے ہیں جو ہمیشہ رہیں گے، ہمیں مل جل کر بات چیت سے ہی آگے بڑھنا ہوگا، میری کوشش ہے کہ برف پگھلے اور مسائل کم ہوں۔انہوں نے مزید کہا کہ لوگ آپس میں ملنا چاہتے ہیں، اختلافات ایسے نہیں کہ حل نہ ہوں، ہم سب کو مل کر امن کی بات کرنی چاہیے، ہمیں سیکورٹی ایشوز کو الگ اور دیگر معاملات کو الگ دیکھنا ہوگا۔ انہوں نے کہا ستر سال سے اپنائی گئی پالیسی کسی کے لئے فائدہ مند نہیں دونوں ممالک میں نوجوانوں کی بڑی تعداد موجود ہے۔ نوجوان نسل ماضی کی تلخیوں سے دور ہے۔۔ غربت‘ پسماندگی‘ ناخواندگی دونوں ممالک کے مسائل ہیں۔

موضوعات:بھارتی ہائی کمشنر