مردان (مانیٹرنگ ڈیسک)مردان میں ایک اور بچی کے ساتھ جنسی زیادتی، 8سالہ روبینہ تشویشناک حالت میں ہسپتال داخل، جنسی درندہ پڑوسی نکلا، فرار ہوتے ہوئے پولیس نے پکڑ لیا،علاقے میں خوف و ہراس، عوام نے عاصمہ اور روبینہ واقعات میں ملوـث ملزمان کو سخت سزائیں دینے کا مطالبہ کر دیا۔ تفصیلات کے مطابق مردان میں ننھی عاصمہ کے بعد 8سالہ روبینہ بھی جنسی درندگی کی

نشانہ بن گئی ہے۔ بتایا جاتا ہے کہ مردان کے تھانہ خرکئی کی حدود میں 8سالہ بچی روبینہ اپنے گھر کے قریب کھیل رہی تھی کہ اس دوران اس کے پڑوسی محمد نواز نے اسے قریبی کھیتوں میں لے کر ہوس کا نشانہ بنا ڈالا جس پر بچی کی چیخ و پکار پر اہل محلہ اکٹھے ہو گئے اور پولیس کو اطلاع دی ۔ اہل محلہ اور پولیس نے بروقت کارروائی کرتے ہوئے فرار ہوتے ملزم محمد نواز کو گرفتار کر لیا ہے۔ 8سالہ روبینہ کو تشویشناک حالت میں ہسپتال داخل کرا دیا گیا جہاں اس کا طبی معائنہ کیا جا رہا ہے۔ ملزم محمد نواز نے اعتراف جرم کر لیا ۔ پولیس نے ملزم کے خلاف مقدمہ درج کر کے اس حوالات منتقل کر دیا ہے۔ عاصمہ کے بعد 8سالہ روبینہ کیساتھ زیادتی کے واقعہ نے علاقہ میں خوف و ہراس پھیلا دیا ہے علاقہ مکینوں نے حکومت سے عاصمہ اور روبینہ کے واقعات میں ملوث ملزمان کو سخت سزائیں دینے کا مطالبہ کیا ہے۔واضح رہے کہ مردان میں اس سے قبل اسی طرح کا ایک اور اندوہناک واقعہ ہو چکا ہے جس میں 4سالہ بچی عاصمہ کو کھیتوں میں ہی جنسی درندگی کا نشانہ بنانے کے بعد ملزم نے قتل کر ڈالا تھا جس کی لاش کھیتوں سے برآمد ہوئی تھی۔ پولیس تاحال عاصمہ کے قاتل کو گرفتار نہیں کر سکی ہے۔

موضوعات:روبینہ زیادتی کیس عاصمہ زیادتی کیس مردان