اسلام آباد(آئی این پی)وفاقی دارالحکومت اسلام آباد کی شاہراہوں پر جابجا آویزاں بینرز میئر اسلام آباد چیئرمین شیخ انصر عزیز کے حکم پر سرکاری (سی ڈی اے) ملازمین سے لگوائے جانے کا انکشاف، چیئرمین سی ڈی اے نے اپنے آقا سابق وزیراعظم نوازشریف کو خوش کرنے کیلئے اختیارات کا ناجائز استعمال کرتے ہوئے سیاسی ریلی میں سرکاری ملازمین سے بینرز لگوائے ، مبینہ طور پر سیاسی پوسٹرز اور بینروں کی فیس بھی سی ڈی اے کے اکاؤنٹ میں نہیں جائے گی بلکہ یہ مفت میں لگائے گئے ہیں ۔

دو برے اداروں کا سربراہ ہونے کے ناطے میئر وچیئرمین سی ڈی اے نے خلاف قانون سیاسی ریلی میں سرکاری ذرائع استعمال کئے ۔ اکثر بینروں پر چیئرمین سی ڈی اے کی طرف سے باقاعدہ جملے درج تھے ۔ شیخ انصر عزیز کوئی سیاستدان یا ممبر اسمبلی نہیں بلکہ دو اہم قومی اداروں کے سربراہ ہیں ۔ گزشتہ روز سابق وزیراعظم نوازشریف کی جانب سے نکالی گئی سیاسی ریلی کے موقع پر میئر وچیئرمین سی ڈی اے شیخ انصر عزیز نے خلاف قانون سرکاری ذرائع کو اپنے ذاتی سیاسی مفادات کیلئے استعمال کیا جو کہ جواب طلب ہے ۔

موضوعات:شیخ انصر میئر اسلام آباد