آج سے دو دن قبل وفاقی وزیر فیصل واوڈا نے کاشف عباسی کے پروگرام میں ایک بوٹ میر پر رکھ دیا اور بوٹ دکھا کر کہا‘ پاکستان مسلم لیگ ن نے لیٹ کر‘چوم کر ووٹ کو عزت دی‘یہ پاکستان کی تاریخ کا انتہائی نامناسب اور افسوس ناک واقعہ تھالیکن اس اذیت ناک اور افسوس ناک واقعے کا نتیجہ کیا نکلا؟
پیمرا نے کا شف عباسی اور ان کے پروگرام پر دو ماہ کے لیے پابندی لگا دی جب کہ وزیراعظم نے 48 گھنٹے بعد اپنے وفاقی وزیر کو 15 دن کے لیے ٹیلی ویژن شوز میں جانے سے روک دیا‘ آپ انصاف دیکھئے جس نے یہ نامناسب کام کیا وہ اس کے باوجود وفاقی وزیرہیں‘ وہ صرف 15 دن شوز میں شریک نہیں ہو ں گے اور جس کے شو کو خراب کیا گیا‘ جس کے میز پر جوتا رکھ دیا گیا وہ 60 دن کے لیے بین کر دیا گیا‘ کیا ہم اس کو انصاف کہیں گے‘ کیا یہ مناسب ہے، اس سارے ایشو میں اصل ذمہ دار فیصل واوڈا ہیں‘ سزا صرف اور صرف ان کو ملنی چاہیے تھی‘ کیا ہم لوگ لائیو شو کرنے سے پہلے مہمانوں کی تلاشی لیا کریں یا ان سے یہ حلف لیا کریں کہ یہ جوتا تو میز پر نہیں رکھ دیں گے؟ میری حکومت سے درخواست ہے آپ اصل ذمہ دار کو سزا دیں، اس میں شو، میزبان اور میز کا کوئی قصور نہیں۔ آئی جی سندھ کے ایشو میں ایم کیو ایم بھی کود پڑی،نیب نے آج آصف علی زرداری‘ میاں نواز شریف اور یوسف رضا گیلانی کے خلاف بدعنوانی کا ریفرنس دائر کرنے کا فیصلہ کر لیا جبکہ زلفی بخاری کے خلاف تحقیقات بند ہو گئیں۔
