سرینگر(این این آئی) غیر قانونی طور پر بھارت کے زیر قبضہ جموں و کشمیر میں کنٹرول لائن کے نزدیک تحصیل کرناہ کے گائوں جبڑی میں نام نہاد ڈی ڈی سی انتخابات میں پولنگ بوتھ ویرانی کا منظر پیش کررہے تھے اور پورے گائوں میں

ایک بھی ووٹ نہیں ڈالا گیا۔کشمیر میڈیا سروس کے مطابق گاؤں کے کل 336 ووٹوں میں سے ایک بھی ووٹ پول نہیں ہوا۔ مقامی انتظامیہ نے دن بھر لوگوں کو اپنا ووٹ کاسٹ کرنے کے لئے راضی کرنے کی کوشش کی لیکن وہ ان کو قائل کرنے میں ناکام رہی۔مکینوں کا کہنا ہے کہ وہ طویل عرصے سے اپنے علاقے میں بنیادی سہولیات کی عدم فراہمی کی شکایت اور کنٹرول لائن پرگولہ باری سے نمٹنے کے لئے بنکروں کی تعمیرکا مطالبہ کر رہے ہیں لیکن ان کے مطالبے پر کوئی کان نہیں دھرتا۔ انہوںنے کہا کہ وہ اپنا حق رائے دہی استعمال نہیں کریں گے کیونکہ قابض حکام نے گاؤں کی پوری آبادی کو بھارتی فوج کے رحم وکرم پر چھوڑدیا ہے۔انہوں نے کہاکہ وہ بریگیڈ کمانڈر کی اجازت کے بغیر اپنی ضروریات کو بھی پورا کرنے سے قاصر ہیں حتیٰ کہ بھارتی فوج کی اجازت کے بغیر ہم اچھے اوربرے وقتوں میں اپنے رشتہ داروں سے بھی نہیں مل سکتے جبکہ دفعہ 370کے خاتمے کے بعد ہماری مشکلات میں مزید اضافہ ہوگیا ہے۔

موضوعات:بھارتی مظالم