لاہور(آئی این پی) لاہور ہائیکورٹ بار اور وکلارہنماو ں نے سابق وزیر اعظم نواز شریف اور ان کی بیٹی مریم نواز کی عدلیہ مخالف تقاریر کی شدید الفاظ میں مذمت کرتے ہوئے اس معاملہ پر آل پاکستان وکلاکنونشن بلانے کا اعلان کر دیا، وکلانے عدلیہ سے بھی مطالبہ کیا ہے کہ میاں نواز شریف اور ان کی صاحبزادی کے خلاف کارروائی عمل میں لائی جائے۔لاہور ہائیکورٹ بار ایسوسی ایشن کے صدر ذوالفقارچودھری نے ہائیکورٹ بار کے

دیگر عہدیداروں اور پنجاب بار کونسل کے رکن منیر بھٹی کے ہمراہ مشترکہ پریس کانفرنس میں اعلان کیا کہ وکلاقانون کی بالا دستی کے معاملے پر متحد اور اکٹھے ہیں، وکلا نے کرپشن کے خلاف جہاد کا اعلان کیا ہے، وکلا نے حیرت کا اظہار کیا کہ حق میں فیصلہ آئے تو ٹھیک ہے اور مخالف فیصلے پر تنقید کی جاتی ہے، وکلارہنماو ں نے افسوس کا اظہار کیا کہ سپریم کورٹ کے عام شہریوں کے حقوق کے لیے از خود نوٹس حکمرانوں کو بھا نہیں رہے، وکلا رہنماو ں نے واضح کیا کہ گر کوئی اپنی ذات کے لیے اداروں میں تصادم کرتا ہے تو وہ قابل قبول نہیں، چیف جسٹس پاکستان کی ڈیڑھ لاکھ کی فوج ان کے پیچھے کھڑی ہے، کسی کو شیخ مجیب اور حسینہ واجد نہیں بننے دیں گے، وکلا رہنماؤ ں نے اعلان کیا کہ تمام وکلاتنظیموں سے رابطے کرکے جلد آل پاکستان وکلاکنونشن بلا یا جائے جس میں آئندہ لائحہ عمل ترتیب دیا جائے گا۔