اسلام آباد (نیوز ڈیسک) پاکستان کے نوجوان فاسٹ بولر رضا اللہ نے انگلینڈ کے خلاف ایجبسٹن ٹیسٹ میں اپنے بین الاقوامی کیریئر کا آغاز کرتے ہوئے غیر معمولی کارکردگی کا مظاہرہ کیا اور پہلی ہی اننگز میں اپنی صلاحیتوں کا لوہا منوا لیا۔

مردان سے تعلق رکھنے والے 21 سالہ دائیں ہاتھ کے تیز گیند باز نے ٹیسٹ کرکٹ میں اپنی چوتھی گیند پر انگلینڈ کے تجربہ کار بلے باز جو روٹ کو ایل بی ڈبلیو آؤٹ کردیا۔ یوں انہوں نے ٹیسٹ کرکٹ کی پہلی ہی وکٹ کے طور پر دنیا کے کامیاب ترین بلے بازوں میں شمار ہونے والے جو روٹ کی وکٹ حاصل کی۔رضا اللہ کے قومی ٹیم تک پہنچنے کا سفر بھی انتہائی دلچسپ ہے۔ رپورٹس کے مطابق انگلینڈ کے دورے کے لیے ان کے انتخاب کے وقت نوجوان فاسٹ بولر کے پاس پاسپورٹ موجود نہیں تھا۔ سلیکٹرز نے جب ان سے رابطہ کرنے کی کوشش کی تو ان کا موبائل فون بند ملا، جس کے بعد مبینہ طور پر ایک کوچ کو ان کے گاؤں بھیجا گیا۔صورتحال کی نزاکت کو دیکھتے ہوئے فوری طور پر ان کے پاسپورٹ اور ویزے کا انتظام کیا گیا اور رضا اللہ انگلینڈ روانہ ہوگئے۔ وہاں پہنچنے کے بعد انہیں صرف اسکواڈ میں شامل نہیں کیا گیا بلکہ براہ راست پلیئنگ الیون کا حصہ بنا دیا گیا۔نوجوان پیسر نے اپنی تیز رفتار گیندوں سے بھی سب کو متاثر کیا اور میچ کے ابتدائی مرحلے میں ان کی رفتار 92 میل فی گھنٹہ تک ریکارڈ کی گئی۔ کھیل کے پہلے دن کے اختتام تک رضا اللہ 2 وکٹیں اپنے نام کرچکے تھے۔

رضا اللہ نے گزشتہ سال نومبر میں پشاور کی نمائندگی کرتے ہوئے قائداعظم ٹرافی سے فرسٹ کلاس کرکٹ میں قدم رکھا تھا۔ اس سے قبل مردان ڈسٹرکٹ ٹیم کی جانب سے کھیلتے ہوئے ان کی صلاحیتوں نے پشاور ریجن کے کوچ عبدالرحمان کی توجہ حاصل کی تھی۔ایجبسٹن ٹیسٹ میں رضا اللہ کی عمدہ بولنگ نے سابق کرکٹرز سمیت دنیا بھر کے شائقین اور مبصرین کو متاثر کیا، جبکہ بھارتی کرکٹ ناقدین کی جانب سے بھی نوجوان پاکستانی فاسٹ بولر کی کارکردگی کو سراہا گیا۔