ممبئی (این این آئی) ورلڈ کپ کے39ویں میچ میں آسٹریلوی بلے باز گلین میکسویل کی شاندار اننگز کی بدولت آسٹریلیا نے افغانستان کو 3وکٹوں سے شکست دے کر سیمی فائنل کیلئے کوالیفائی کرلیا۔تفصیلات کے مطابق آسٹریلیا اور افغانستان کے درمیان ورلڈ کپ کا میچ ممبئی کے وانکھڈے سٹیڈیم میں کھیلا جارہا ہے جہاں افغانستان نے آسٹریلیا کے خلاف ٹاس جیت کر بیٹنگ کا فیصلہ کیا۔

افغانستان نے مقررہ 50اوورز میں 5وکٹوں کے نقصان پر 291رنزبنائے، ابراہیم زدران 129رنزبناکر ناقابل شکست رہے اور ورلڈ کپ میں افغانستان کی جانب سے سنچری سکور کرنے والے پہلے بیٹر بن گئے۔اس کے علاوہ رحمت شاہ 30اور حشمت اللہ نے 26 رنزبنائے جبکہ عظمت اللہ 22 ، رحمان اللہ گرباز 21 اور محمدنبی نے 12 رنز اسکور کیے۔

راشدخان 35 رنز بنا کرناٹ آئوٹ رہے۔آسٹریلیا کی جانب سے جوش ہیزل ووڈ نے 2کھلاڑیوں کو آئوٹ کیا، ایڈم زمپا اور گلین میکسویل نے ایک ایک وکٹ حاصل کی۔آسٹریلیا نے کھیلنا شروع کیا تو 91 رنز کے مجموعی سکور پر اس کی 7وکٹیں گر گئیں جس کے بعد گلین میکسویل نے ٹانگ میں تکلیف کے باوجود اکیلے ہی گرائونڈ میں چھکے چوکے مار کر 201رنز کی شاندار اننگز کھیلی اور افغان بائولر زکا بھرکس نکال کر فتح اپنے نام کر کے سیمی فائنل کیلئے کوالیفائی کرلیا۔