نئی دہلی(این این آئی) سری لنکا کے کپتان کوشل مینڈس نے بھارتی اسٹار بیٹر ویرات کوہلی کو سنچری کی مبارک باد دینے سے انکار کردیا۔سری لنکن کرکٹ ٹیم کے کپتان کوشل مینڈس سے پریس کانفرنس میں بھارتی صحافی نے سوال کیا کہ کیا آپ ویرات کوہلی کو 49 ویں سنچری بنانے پر مبارک باد دیں گے تو وہ حیران رہ گئے۔کوشل مینڈس پہلے ادھر ادھر دیکھتے رہے پھر ہنستے ہوئے کہا کہ میں کوہلی کو کیوں مبارک باد دوں۔

سری لنکن کپتان کا صاف جواب سوشل میڈیا پر وائرل ہوگیا۔ایک ایکس صارف نے کہا کہ بھارتی صحافیوں کو سمجھنا چاہیے کہ دنیا صرف کوہلی اور بھارتی کرکٹ کے گرد نہیں گھوم رہی ہے۔ بھارتی سوشل میڈیا صارفین نے سری لنکن کپتان کو اپنی رائے کا اظہار کرنے پر شدید تنقید کا نشانہ بنایا جبکہ کچھ لوگوں نے کوشل مینڈس کے حق میں ٹوئٹس کیے۔بھارت کے اسٹار بیٹر ویرات کوہلی نے جنوبی افریقہ کے خلاف میچ میں اپنی 49 ویں سنچری اسکور کی تھی۔