لاہور( این این آئی)چیئرمین پی سی بی مینجمنٹ کمیٹی ذکاء اشرف نے کہا ہے کہ ہمیں بہترین فیصلے کر کے کرکٹ بورڈ سے گند کو صاف کرنا پڑے گا، وزیراعظم کا اختیار ہے کہ مجھے عہدے پر برقرار رکھتے ہیں یا نہیں، ہم نے ماضی میں پاکستان ٹیم کی عزت کو بحال رکھا اب بھی رکھ سکتے ہیں۔ایک انٹر ویو میں انہوںنے کہا کہ ٹیم مینجمنٹ ،کوچز کا مورال خراب نہیں کرنا چاہتا، وزیراعظم نجم سیٹھی یا کسی اور کو لائیں تو ان کیلئے بھی نیک خواہشات ہیں کھینچاتانی سے بورڈ کو نقصان ہوتا ہے ،باعزت طریقے سے آنا جانا چاہیے، لڑائی جھگڑا چھوڑ کر کرکٹ کی بہتری کے لئے کام کرنا چاہیے۔

جے شاہ سے ملاقات کا احوال بتاتے ہوئے انہوں نے کہا کہ بھارت گیا تو جے شاہ نے بہت عزت دی ،جے شاہ نے مجھے 2،3دن پہلے بھی ٹیلی فون کیا اور کہا باقی چیئرمین سے بھی ملا لیکن آپ سے مل کر بہت اچھا لگا۔ذکاء اشرف نے کہا کہ ہم جلد پاکستان اور بھارت کے کرکٹ تعلقات کو بہتر کرلیں گے، پاکستانی شائقین، صحافیوں کے ویزوں سے متعلق درخواست کی تھی ہم صرف درخواست ہی کرسکتے تھے زبردستی ویزے تو لے نہیں سکتے تھے۔