اسلام آباد (این این آئی)انٹرنیشنل کرکٹ کونسل (آئی سی سی) نے زینب عباس کے بھارت چھوڑنے کی تصدیق کردی۔آئی سی سی ترجمان کے مطابق زینب عباس بھارت سے ”ذاتی وجوہات ”کی وجہ سے گئی ہیں،انہیں ڈی پورٹ کرنے کی بات درست نہیں۔اس سے قبل پریزینٹر کے قریبی ذرائع نے بتایا تھا کہ زینب بھارت سے دبئی پہنچ گئی ہیں۔قریبی ذرائع کے مطابق زینب پر بھارت میں بہت زیادہ دباؤ بڑھ رہا تھا جس کی وجہ سے انہوں نے حفاظتی اقدام کے طور پر بھارت چھوڑدیا، زینب نے براڈ کاسٹرز اور فیملی کے مشورے پر یہ اقدام اٹھایا۔کچھ میڈیا رپورٹس میں دعویٰ کیا جارہا ہے کہ زینب عباس کو بھارت سے ڈی پورٹ کیا گیا ہے۔

واضح رہے کہ ورلڈ کپ پریزینٹرز پینل میں شامل زینب عباس کیخلاف بھارت میں بے بنیاد پراپیگنڈہ مہم چلائی گئی، بھارتی وکیل نیالزام لگایا تھا کہ زینب نے ہندو مذہب اور بھارت کیخلاف سوشل میڈیاپرپیغامات لکھے۔بھارتی وکیل نے سوشل میڈیا تبصروں کو زینب عباس سے منسوب کرکے ان کاتبصرہ قرار دیا، بھارتی وکیل نے زینب عباس کے خلاف پرچہ کاٹنے کی درخواست بھی دیدی،وکیل نے زینب کے خلاف سائبر کرائم پولیس کو درخواست دی، جس میں کہا گیا کہ زینب کے مبینہ تبصریبھارت مخالف ہیں، ایف آئی آر کاٹی جائے۔