اسلام آباد (مانیٹرنگ ڈیسک/این این آئی)ماریشیس میں بھارتی سفارت خانے نے پاکستان کی فٹبال ٹیم کو ویزے جاری کر دیے جس کے بعد اس بات کے قوی امکان پیدا ہو گئے ہیں کہ اب پاکستانی ٹیم بھارت میں ہونے والی ساف چیمپئن شپ میں شرکت کرے گی۔
دوسری جانب نیدر لینڈز کے شہر روٹرڈیم میں کھیلے گئے نیشنز لیگ کے فائنل میچ میں اسپین نے سنسنی خیز مقابلے کے بعد کروشیا کو 4 کے مقابلے 5 گول سے شکست دیکر ٹائٹل اپنے نام کرلیا۔میچ کا مقررہ وقت ختم ہونے کے بعد دونوں ٹیموں کی جانب سے شاندار کھیل کا مظاہرہ کرنے کے باعث کوئی بھی گول نہ ہو سکا جس کے بعد میچ کا فیصلہ پینلٹی شوٹ آؤٹ کے ذریعے کیا گیا۔دونوں ٹیموں نے پینلٹی شوٹ آؤٹ میں بھی بھرپور مقابلہ کرتے ہوئے مقررہ 5-5 پینلٹی ککس میں سے چار مرتبہ بال کو جال کے اندر پھینکنے میں کامیابی حاصل کی۔پینلٹی شوٹ آؤٹ میں بھی جب میچ چار چار سے برابر رہا تب اسپین کی جانب سے ڈینی کارواجل نے پینلٹی شوٹ آؤٹ میں فیصلہ کن گول کرکے اپنی ٹیم کو فتح دلائی۔31 سالہ اسپینش کھلاڑی ڈینی ریال میڈرڈ کیلئے پانچ چیمپئنز لیگ ٹائٹل بھی اپنے نام کر چکے ہیں جبکہ اسپین کی ٹیم نے 2012 کے یورپی چیمپئن شپ کے بعد پہلی مرتبہ کوئی ٹائٹل جیتنے میں کامیابی حاصل کی ہے۔اسپین کی فٹبال ٹیم نے دو سال قبل بھی نیشنز لیگ کے فائنل تک رسائی حاصل کی تھی تاہم انہیں فرانس کے ہاتھوں شکست کا سامنا کرنا پڑا تھا۔ڈینی کارواجل کا کہنا تھا کہ قطر میں ہونے والے فیفا ورلڈ کپ میں ناقص کارکردگی اور مراکش کے ہاتھوں اپ سیٹ شکست کے بعد نیشنز لیگ فائنل میں اس فتح نے کھلاڑیوں کے حوصلے بلند کر دیے ہیں۔
