ملتان(این این آئی) قومی ٹیم کے بیٹر امام الحق نے کہاہے کہ وہ کیریئر کا 50ون ڈے ملتان اسٹیڈیم میں کھیلتے ہوئے یادگار بنانے کی کوشش کریں گے۔ایک انٹرویو میں امام الحق نے کہا ہے کہ یہاں اپنے چچا انضمام الحق کو کھیلتے ہوئے دیکھا ہے،

ملتان میں اپنا پہلا میچ کھیلنے اور عمدہ کارکردگی دکھانے کیلیے بیتاب ہوں،میری پیدائش اسی شہر میں ہوئی، بعد ازاں بچپن میں لاہور منتقل ہوگئے،اسٹیڈیم سے کئی یادیں وابستہ ہیں۔اوپنر نے کہا کہ کیریئر میں اتار چڑھاؤ کے دوران فیملی اور ٹیم میں موجود ساتھیوں کی بھرپور اسپورٹ رہی،اپنی کرکٹ سے ہمیشہ لطف اندوز ہوا اور ابھی تک جو حاصل کیا، اس پر مطمئن ہوں،کارکردگی کا تسلسل برقرار رکھنے کیلئے پر عزم ہوں، ہوم گراؤنڈ پر کیریئر کا 50 واں ون ڈے میچ کھیلنے کا موقع ملنا خوش آئند ہے، اس کو اپنی کارکردگی سے یادگار بنانے کی کوشش کروں گا۔یاد رہے کہ امام الحق نے ڈیبیو کے بعد ابھی تک 54 کی اوسط سے 2321رنز بنائے ہیں، جو اس عرصہ میں بابر اعظم کے بعد کسی بھی پاکستانی بیٹر سے زیادہ سکور ہے، اوپنر نے ڈیبیو پر سنچری کے بعد بھی 8تھری فیگر اننگز کھیلی ہیں۔