لاہور(این این آئی)پاکستان اور بنگلہ دیش کے درمیان ٹی ٹونٹی سیریز کا تیسرا میچ بارش کے سبب منسوخ کردیا گیا، ٹی ٹونٹی سیریز میں 0-2 کی فتح کی بدولت پاکستان کی عالمی نمبر ایک پوزیشن برقرار ہے،پاکستان کرکٹ بورڈ نے بارش کی نذر ہونے والے تیسرے ٹی ٹونٹی میچ کے خریدے گئے ٹکٹ کی قیمت واپس کرنے کا اعلان کیا ہے۔

بنگلہ دیش کے خلاف ٹی20 سیریز کا تیسرا میچ بھی لاہور کے قذافی اسٹیڈیم میں کھیلا جانا تھا لیکن لاہور میں صبح سے جاری مسلسل بارش کے سبب میچ کا ٹاس بھی ممکن نہ ہو سکا۔اس دوران امپائرز نے کئی مرتبہ گراؤنڈ کا رخ کیا لیکن تواتر کے ساتھ جاری بارش کے سبب میچ شروع ہونے کا امکان پیدا نہ ہو سکااوربالآخر بارش نہ رکنے کے بعد امپائرز نے دونوں ٹیموں کے کپتان اور میچ ریفری سے مشاورت کے بعد میچ منسوخ کرنے کا اعلان کردیا۔قومی ٹیم کے کپتان بابر اعظم کو سیریز کا بہترین کھلاڑی قرار دیا گیا جنہوں نے بطور کپتان پہلی سیریز جیتنے کا اعزاز بھی حاصل کر لیا۔میچ بارش کی نذر ہونے اور سیریز میں 0-2 کی فتح کی بدولت پاکستان کی ٹیم عالمی نمبر ایک پوزیشن بھی برقرار رکھنے میں کامیاب رہی۔عالمی درجہ بندی میں پاکستان 270پوائنٹس کے ساتھ پہلے، آسٹریلیا 269پوائنٹس کے ساتھ دوسرے، انگلینڈ تیسرے، جنوبی افریقہ چوتھے اور بھارت پانچویں نمبر پر موجود ہے۔دوسری جانب پاکستان کرکٹ بورڈ نے بارش کی نذر ہونے والے تیسرے ٹی20 میچ میں شائقین کے ٹکٹ کی قیمت واپس کرنے کا اعلان کیا ہے۔تاہم اس حوالے سے طریق کار بعد میں طے کیا جائے گا۔ ذرائع کے مطابق ممکنہ طو رپر شائقین کرکٹ کوریئر سینٹرز پر ٹکٹس واپس کر کے قیمت واپس وصول کر سکیں گے۔