لاہور(این این آئی)بولنگ کوچ اظہر محمود نے کہا ہے کہ پاکستانی ٹیم کو غلطیوں سے سبق سیکھنا ہوگا۔ایک انٹرویومیں اظہر محمود نے کہا کہ گلین میکسویل بیٹنگ کیلئے آئیں تو ابتدا میں خطرناک انداز میں کھیلتے ہوئے مواقع دیتے ہیں، ان کا کیچ ڈراپ کردیا جائے تو رنز روکنا مشکل ہو جاتا ہے، وہ ریورس اور پیڈل سوئپ سمیت غیر روایتی اسٹروکس کے ساتھ تیزی سے اسکور کرتے ہیں۔انھوں نے کہا کہ گلین میکسویل اور ایرون فنچ جیسے
بیٹسمینوں کے خلاف بولنگ کیلئے تجربہ چاہیے، جنید خان نے دونوں کے خلاف عمدہ بولنگ کی لیکن محمد حسنین مشکلات کا شکار نظر آئے۔اظہر محمود نے ایرون فنچ کی عمدہ بیٹنگ کو سراہتے ہوئے کہا کہ میں سرے کاؤنٹی میں ان کے ساتھ کھیل چکا اور اچھی طرح جانتا ہوں کہ اگر فنچ کا بیٹ چل پڑے تو روکنا مشکل ہو جاتا ہے، وہ اس وقت کیریئر کی بہترین فارم میں ہیں اور اچھی طرح جانتے ہیں کہ کہاں رکنا اور کہاں جارحانہ انداز اپنانا ہے۔
