ایڈیلیڈ(آئی این پی) آسٹریلیا کے سابق کوچ ڈیرن لی مین بے ایمان کرکٹرز کے قصیدے پڑھنے لگے، انھوں نے بال ٹیمپرنگ میں پابندی کے شکار کھلاڑیوں کو انتہائی اچھے انسان قرار دے دیا۔دورہ جنوبی افریقہ کے دوران آسٹریلوی ٹیم بال ٹیمپرنگ کرتے ہوئے رنگے ہاتھوں پکڑی گئی مگر حیران کن طور پر اس سارے واقعے میں ملوث ہونے کا الزام صرف کپتان اسمتھ ، نائب کپتان وارنر

اور اوپننگ بیٹسمین بینکرافٹ پر آیا ۔کرکٹ آسٹریلیا کی جانب سے ہونے والی تحقیقات میں اس وقت کے ہیڈ کوچ ڈیرن لی مین کو کلین چٹ دی گئی مگر بعد ازاں انھوں نے اپنی ذمہ داری سے استعفی دے دیا، ان کی جگہ جسٹن لینگر کو نیا آسٹریلوی کوچ مقرر کیا گیا ہے۔لی مین اب ان ہی تینوں کرکٹرز کی تعریف میں زمین آسمان ایک کررہے ہیں اور انھیں انتہائی اچھا انسان بھی قرار دے رہے ہیں۔ان کا کہنا تھا کہ یہ سب نوجوان ہیں، مجھے خاص طور پر ان تینوں سے انتہائی ہمدردی ہے، میں ان کی روز مرہ زندگی کے حوالے سے کافی فکر مند ہوں، مجھے امید ہے کہ وہ ایک بار پھر ٹیم میں واپس آئیں اور آسٹریلیا کے لیے کھیلیں گے، وہ انتہائی حیران کن کھلاڑی اور وہ اپنے کیے کی قیمت ادا کرچکے ہیں۔لی مین نے کہا کہ میرے لیے آسٹریلوی کرکٹ بہت ہی زیادہ اہم ہے اور مجھے پوری امید ہے کہ ہر کوئی نہ صرف واپس آئے گا بلکہ ایسی کرکٹ کھیلے گا کہ ہر کوئی ان کی دوبارہ سے عزت کرنے لگا گے، ان کا یہ بھی کہنا تھا کہ اس اسکینڈل کے بعد میرے لیے بھی 6 ہفتے بہت ہی مشکل تھے، مجھے امید ہے کہ ہر کوئی ان تینوں کھلاڑیوں کو معاف کردے گا، وہ بہت ہی اچھے انسان ہیں، میں ان سے بہت ہی زیادہ محبت کرتا ہوں، میں نے ان سے کئی بار بات کی ہے، میں ان سے مستقل رابطہ رکھے ہوئے ہوں کیونکہ مجھے ان کی فکر ہے، وہ اب کافی بہتر حالت میں ہیں۔