سڈنی(آئی این پی ) سابق آسٹریلوی قائد اور سٹار بلے باز سٹیون سمتھ اور کیمرون بینکرافٹ نے کرکٹ آسٹریلیا کی جانب سے بال ٹیمپرنگ سکینڈل پر عائد پابندیوں کے فیصلے کو چیلنج نہ کرنے کا اعلان کر دیا۔ کرکٹ آسٹریلیا نے سمتھ پر ایک برس اور بینکرافٹ پر 9 ماہ تک ڈومیسٹک اور انٹرنیشنل کرکٹ کھیلنے پر پابندی عائد کر رکھی ہے، اس کے ساتھ ساتھ دونوں کھلاڑی دو برس تک آسٹریلوی ٹیم کی لیڈرشپ پوزیشن سے بھی محروم رہیں گے۔

سمتھ نے سماجی رابطوں کی ویب سائٹ ٹویٹر پر اپنے پیغام میں کہا کہ بحیثیت کپتان میں واقع کی پوری ذمہ داری قبول کر چکا ہوں، میں ان ساری چیزوں کو پیچھے چھوڑ کر نئے سرے سے دوبارہ ملک کی نمائندگی کرنا چاہتا ہوں، کرکٹ آسٹریلیا نے سخت سزائیں دے کر دوسرے کھلاڑیوں کیلئے ایک مثال قائم کی ہے اسلئے میں پابندی کے خلاف اپیل نہیں کروں گا، سمتھ کے ٹویٹ کے تھوڑی دیر بعد کیمرون بینکرافٹ نے اعلان کیا کہ وہ کرکٹ آسٹریلیا کی طرف سے دی گئی نو ماہ کی سزا کو تسلیم کرتے ہیں اور اسے چیلنج نہیں کریں گے۔پابندی کا شکار ایک اور آسٹریلوی کرکٹر ڈیوڈ وارنر کی جانب سے تاحال کوئی اعلان سامنے نہیں آیا، وارنر کو بھی ایک برس پابندی کا سامنا ہے اور کرکٹ آسٹریلیا نے انہیں ٹیم کی قیادت کیلئے تاحیات نااہل قرار دیا تھا۔