اسلام آباد (نیوز ڈیسک) مقبوضہ کشمیر میں بھارت کی جانب سے نہتے کشمیریوں پر مظالم کا سلسلہ جاری ہے، بھارتی فوج آئے روز نہتے کشمیریوں کو نشانہ بناتی رہتی ہے، گزشتہ دو روز میں بھارتی فوجی 19 نہتے کشمیری شہید کر چکی ہے، ایک طرف دنیا کی جانب سے اس پر شدید ردعمل دیکھنے کو مل رہا ہے تو دوسری جانب پاکستان کے معروف کرکٹر شاہد آفریدی نے بھی بھارت کی جانب سے کشمیریوں پر ڈھائے جانے والے
مظالم پر سماجی رابطے کی ویب سائٹ پر اپنے ٹوئیٹ میں کہا کہ مقبوضہ کشمیر میں تشویش ناک صورتحال دیکھنے میں آ رہی ہے، حق خود ارادیت اور آزادی کے لیے آواز اٹھانے والے معصوم شہریوں کو غاصب حکومت کی طرف سے شہید کیا جا رہا ہے، انہوں نے اپنے ٹویٹ پیغام میں مزید کہا کہ حیرانی ہے کہ اقوام متحدہ اور دیگر انٹرنیشنل ادارے کہاں ہیں اور وہ اس خونی کھیل کوروکنے کے لیے کوئی اقدامات کیوں نہیں اٹھا رہے۔
