اسلام آباد(آئی این پی ) انٹرنیشنل جیولین تھرو کے کھلاڑی ارشد ندیم نے کہا ہے کہ کامن ویلتھ گیمز میں قوم کو مایوس نہیں کروں گا، انٹرنیشنل سطح کی سہولیات فراہم کی جائیں تو اولمپک میں بھی میڈلز لاسکتا ہوں ۔ گذشتہ روزکامن ویلتھ گیمز میں شرکت کے لئے آسٹریلیا روانگی سے قبل بے نظیر انٹرنیشنل ایئرپورٹ پر گفتگو کرتے ہوئے انہوں نے کہا کہ حکومت دیگر کھیلوں کی طرح اتھلیٹکس کے کھیل پر بھی توجہ دے اور اس کی سالانہ گرانٹ میں اضافہ کرے ۔
تاکہ کھلاڑیوں انٹرنیشنل سطح پر ملک کا نام روشن کر سکیں۔انہوں نے کہا کہ میں پوری امید سے کہتا ہوں کہ اگر حکومت مدد کرے تو اتھلیٹکس کے کھیل میں کافی میڈلز لائے جا سکتے۔ انہوں نے کہا کہ وہ پہلی بار کامن ویلتھ گیمز میں شرکت کر رہے ہیں گیمز میں جیولین تھرو کا کوالیفائنگ رانڈ 13 اپریل کو جبکہ فائنل 14 اپریل کو کھیلا جائیگا ۔ انہوں نے کہا کہ کامن ویلتھ گیمز کی تیاری کے دوران تربیتی کیمپ میں میرے کوچ فیاض حسین بخاری نے میری بھر پور تربیت اور رہنمائی کی ہے، قومی خواتین کھلاڑی نجمہ پروین جن کا پاکستان واپڈا سے تعلق ہے نے کہا کہ وہ کامن ویلتھ گیمز میں 200 اور 400 میٹر دوڑ کے مقابلوں میں حصہ لیں گی وہ بھی پہلی کامن ویلتھ گیمز میں پاکستان کی نمائندگی کررہی ہیں ۔انہوں نے کہا کہ انہوں نے کوچ حیدر شاہ کی کوچنگ میں بھرپور محنت کی ہے اور امید ہے کہ کامن ویلتھ گیمز میں شاندار کارکردگی کا مظاہرہ کروں گی۔ دونوں کھلاڑیوں نے کہا کہ کئی بار فنڈز کی کمی باعث کئی عالمی مقابلوں میں کھلاڑی شرکت نہیں کرسکے جس کے بعد پاکستان اتھلیٹکس فیڈریشن کے صدر میجر جنرل (ر)محمد اکرم ساہی کی ذاتی کو ششوں اور کاوشوں سے کھلاڑیوں کو انٹرنیشنل مقابلوں کے لئے بیھجا جا رہا ہے اور اکرم ساہی صاحب خود کھلاڑی رہے ہیں اور کھلاڑیوں کے مسائل کو بھی سمجھتے ہیں اور اکرم ساہی صاحب کی کوشش ہوتی ہے کہ کھلاڑیوں کو ہر عالمی سطح پر ٹورنامنٹ میں شرکت کے لئے بھیجا جائے تاکہ کھلاڑیوں کا نقصان نہ ہو کیونکہ کھلاڑی سارا سال محنت کرتے رہتے ہے ورنہ کھلاڑی کی محنت کا ملک وقوم کو کوئی فائدہ نہیں ہوگا۔
