دبئی (سی پی پی )آسٹریلوی کرکٹ ٹیم کے سابق آل راؤنڈر اور کوئٹہ گلیڈی ایٹرز کے کھلاڑی شین واٹسن کا کہنا ہے کہ پی ایس ایل سے پاکستان کے نوجوان ٹیلنٹ کو آگے بڑھنے کا موقع ملے گا ، پی ایس ایل میں شامل کوئی ٹیم کمزور نہیں ، فاسٹ اور سپن باؤلنگ کے ساتھ اچھی بیٹنگ کا امتزاج بھی ایونٹ کا حسن ہے ۔میڈیا سے گفتگو میں شین واٹسن کا کہنا تھا کہ پی ایس ایل دنیا بھر میں کھیلی جانیوالی لیگز کی طرح ہے۔
جس میں نامور کھلاڑی شامل ہیں جن کیخلاف اور ساتھ کھیل کر نوجوان پاکستانی کرکٹرز کو مزید نکھرنے کا موقع ملے گا۔شین واٹسن نے کہا کہ ایونٹ میں شامل کوئی ٹیم کمزور نہیں اور خاص بات یہ ہے کہ فاسٹ اور سپن باؤلنگ کے ساتھ اچھی بیٹنگ کا امتزاج بھی اس ایونٹ کا حسن ہے ، یہ خوش آئند ہے کہ پاکستان سے فاسٹ باؤلر، کوالٹی سپنرز اور زبردست بیٹسمین اس میں شامل ہیں۔پی ایس ایل کے تیسرے ایڈیشن میں کوئٹہ گلیڈی ایٹر زکی نمائندگی سے متعلق سوال پر شین واٹسن کا کہنا تھا کہ کوئٹہ گلیڈی ایٹرز میں زبردست کھلاڑی ہیں اور کوشش ہے کہ کوئٹہ اس بار پی ایس ایل کا ٹائٹل اپنے نام کرنے میں کامیاب رہے۔ سابق آسٹریلوی کرکٹر کا پاکستان میں انٹر نیشنل کرکٹ کی بحالی کے حوالے سے کہنا تھا کہ پاکستانی فینز کیلئے ہوم گراؤنڈ سے دور رہنا کافی مشکل ہے اور پاکستان میں آہستہ آہستہ عالمی کرکٹ واپس آرہی ہے۔پاکستان میں کھیلنے کے حوالے سے شین واٹسن کا کہنا تھا کہ ابھی پاکستان آنے کے بارے میں حتمی فیصلہ نہیں کیا، میرا فیصلہ اکیلے کا نہیں ہوگا بلکہ اس میں پوری فیملی کی رائے شامل ہوگی۔خیال رہے کہ پی ایس ایل کے گذشتہ ایڈیشن میں شین واٹسن نے اسلام آباد یونائیٹڈ کی نمائندگی کی تھی۔
