لاہور (نیوزڈیسک)پی سی بی نے تمام کھلاڑیوں سے جس خفیہ معاہدے پر دستخط لئے اس میں لکھا کیا ہے؟اندر کی بات فوراً ہی باہر آگئی، پاکستان کرکٹ بورڈ کے چیئرمین شہریار خا ن نے اسپاٹ فکسنگ میں سزا یافتہ کرکٹر محمد عامر کی ٹیم میں ممکنہ شمولیت کے معاملے پر قومی ون ڈے ٹیم کے کپتان اظہر علی کا استعفیٰ قبول کرنے سے انکار کر دیا جبکہ پی سی بی نے محمد عامر کے معاملے پر زباں بندی کے لئے تمام کھلاڑیوں سے دستخط بھی لے لئے۔تفصیلات کے مطابق قومی ون ڈے کرکٹ ٹیم کے کپتان اظہرعلی نے چیئرمین پی سی بی شہریار خان سے ملاقات کی۔ اس موقع پراظہرعلی نے محمد عامر کو ون ڈے ٹیم میں ممکنہ طور پر شامل کئے جانے پر شدید تحفظات کا اظہار کیا اور قیادت چھوڑتے ہوئے استعفیٰ پیش کیا جسے انہوں نے قبول کرنے سے انکار کردیا۔ ذرائع کے مطابق چیئرمین پی سی بی شہریار خان نے اظہرعلی کو کپتانی جاری رکھنے پر رضا مند کرلیا جبکہ محمد عامر کے کردار کی بہتری کی ذمہ داری شعیب ملک کو سونپ دی گئی ہے۔دوسری جانب محمد عامر کے معاملے پر ٹیم کے دیگر کھلاڑیوں کی جانب سے بھرپور تحفظات کا اظہارکیا جارہا ہے اور ٹیسٹ ٹیم کے کپتان مصباح الحق، ون ڈے ٹیم کے کپتان اظہرعلی، بلے باز محمد حفیظ اور عمر اکمل کی جانب سے محمد عامر کو ٹریننگ کیمپ میں شامل کئے جانے کے فیصلے پرتحفظات کا اظہارکیا گیا تاہم پی سی بی نے اس معاملے پر زباں بندی کے لئے تمام کھلاڑیوں سے دستخط لے لئے ہے اور انہیں ٹیم میں شامل کرنے کے فیصلے کو عدالتی فیصلے اور نیوزی لینڈ امیگریشن حکام کی جانب سے ویزا جاری کرنے سے مشروط کردیا گیا۔