اسلام آباد (ویب ڈیسک)مصباح الحق نے بھی محمد عامر کی واپسی پر تحفظات کا اظہار کردیا،ٹیسٹ کپتان کا کہنا ہے کہ پیسر کی ٹیم میں شمولیت پر ہونے والی مشکلات کا کسی کو اندازہ نہیں، طرح طرح کے سوالات کپتان کو جھیلنا پڑیںگے۔تفصیلات کے مطابق قومی ٹیسٹ ٹیم کے کپتان مصباح الحق نے برطانوی خبر رساں ادارے کو انٹرویو میں کہاکہ محمد عامر کی واپسی نہ صرف میرے بلکہ کپتانوں اور کھلاڑیوں سب کے لیے ایک مشکل موضوع ہے، سب کے تحفظات ہیں جو یقینا پی سی بی میں موجود کئی عہدیداروں کے بھی ہوںگے۔ انھوں نے کہا کہ لوگ کہتے ہیں کہ پیسر نے سزا پوری کر لی، یہ بات اپنی جگہ ہے کہ سب نے انھیں معاف کر دیا کیونکہ ان کے ساتھ کسی کی ذاتی لڑائی تو ہے نہیں لیکن واپسی کا اثر بہت بڑا سوالیہ نشان ہے۔اس کا ابھی کسی کو بھی اندازہ نہیں ہے، کسی بھی کپتان کے لیے محمد عامر کی موجودگی میں صورتحال کا سامنا کرنا انتہائی مشکل ہو گا، پاکستان کی ٹیسٹ سیریز جولائی میں ہوگی، محدود اوورز کی کرکٹ سے ریٹائر ہونے کی وجہ سے میں کیمپ میں بھی شامل نہیں، اس لیے فی الحال میرا مسئلہ نہیں لیکن اس سے قبل قومی ٹیم کو ون ڈے اور ٹی 20 میچز کھیلنا ہیں۔ان حالات میں کپتانوں کوتندوتیز سوالات جھیلنے پڑیں گے، اسٹیڈیمز میں کراوڈ کے شدید ردعمل کا بھی سامنا ہوگا، محمد عامر انگلینڈ میں کھیلنے جائیں گے تو زیادہ پریشانی ہوگی، لہٰذا یہ ایک ایسا معاملہ ہے جس پر بہت سوچ بچار کی ضرورت ہے۔پی سی بی کی طرف سے تحفظات دور کرنے کی کوششوں کے سوال پر مصباح الحق نے کہا کہ معلوم ہوا تھا کہ ایسی کوئی سرگرمی ہوگی لیکن میرے علم میں نہیں کہ ایسا کوئی قدم اٹھایا گیا، امید ہے کہ اس ضمن میں بات کی جائے گی