لندن (نیوز ڈیسک )انگلینڈ لائنز کے ہیڈ کوچ اور زمبابوے کے سابق کپتان اینڈی فلاور نے پاکستان سپر لیگ میں حصہ لینے کی تصدیق کرتے ہوئے کہا کہ وہ ’کچھ مختلف کرنے کے منتظر ہیں’ مجھ سے پی ایس ایل کی ایک فرنچائز ٹیم پشاور کے بیٹنگ کوچ کیلئے رابطہ کیا گیا ہے۔ واضح رہے فلاور پشاور زلمے کے بیٹنگ مشیر ہوں گے جبکہ نیشنل کرکٹ اکیڈمی کے سابق ہیڈ کوچ محمد اکرم ٹیم کے ہیڈ کوچ ہوں گے۔ اپنے ایک انٹرویو میں ’ میں نے انڈریو سٹراو¿س سے پوچھا کہ آیا یہ انگلش کرکٹ بورڈ کے حوالے سے اچھا ہو گا تو انہوں نے کہا کہ ان ٹی ٹوئنٹی فرنچائز مقابلوں میں حصہ لینا ہمارے انگلش کوچز کیلئے مفید ہے، کیونکہ اس طرح انہیں معلوم ہو گا کہ انگلش ڈومیسٹک کرکٹ کے باہر کیا ہو رہا ہے۔ اس اقدام سے ہمارے کوچز کے دوسرے عالمی کوچز اور کھلاڑیوں سے رابطے بڑھیں گے جس سے انگلینڈ کو فائدہ پہنچے گا‘۔زمبابوے کی نمائندگی کے دوران تین مرتبہ پاکستان آنے والے فلاور پاکستان میں عالمی کرکٹ نہ ہونے کی وجہ سے افسردہ ہیں۔’میں بطور ایک کھلاڑی کئی مرتبہ پاکستان آچکا ہوں اور یہ انتہائی افسوس ناک ہے کہ ہم پاکستان میں عالمی کرکٹ نہیں کھیل رہے‘۔’ میں ایشیا میں ہر جگہ اپنے دوروں میں لطف اندوز ہوا اور پاکستان کا معاملہ بھی مختلف نہیں۔ہم نے یہاں کئی خوبصورت مقامات دیکھے۔ ان میں زیادہ تر شہر تھے لیکن ہمیں پشاور میں بھی ایک ٹیسٹ میچ کھیلنے کا اتفاق ہوا۔ ہم کوئٹہ میں بھی کھیل چکے ہیں‘۔خیال رہے کہ 13 دسمبر کو پی ایس ایل کی پشاور زلمے فرنچائز نے ٹورنامنٹ کیلئے بڑے ناموں پر مشتمل کوچنگ پینل کا اعلان کیا تھا۔فلاور پشاور زلمے کے بیٹنگ مشیر ہوں گے جبکہ نیشنل کرکٹ اکیڈمی کے سابق ہیڈ کوچ محمد اکرم ٹیم کے ہیڈ کوچ ہوں گے۔