اسلام آباد(نیوز ڈیسک ) بنگال کرکٹ اکیڈمی گراﺅنڈ پر اوڈیسہ اور بنگال کا چار روزہ رنجی ٹرافی میچ ڈیڑھ دن میں ختم ہوگیا، میزبان نے حیران کن مقابلہ 133رنز سے جیت لیا، وکٹ بیٹسمینوں کیلیے دہکتی ہوئی آگ ثابت ہوئی، 171 کا ہدف پانے والی اوڈیسہ کی ٹیم محض37رنز پر ڈھیر ہوگئی۔
تفصیلات کے مطابق بھارتی ڈومیسٹک فرسٹ کلاس کرکٹ ٹورنامنٹ رنجی ٹرافی میں بنگال اور اوڈیسہ کا چار روزہ میچ حیران کن طور پر ڈیڑھ دن میں میزبان ٹیم کی 133رنز سے فتح پر ختم ہوگیا، پہلی مرتبہ کسی فرسٹ کلاس کی میزبانی کرنیوالے بنگال کرکٹ اکیڈمی گراﺅنڈ کی وکٹ بیٹسمینوں کیلیے تباہ کن ثابت ہوئی، 171 کا ہدف پانے والی مہمان ٹیم دوسری اننگز میں 19.2 اوور میں محض 37رنز پر ڈھیر ہوگئی، یہ ایونٹ کی تاریخ میں کسی بھی ٹیم کا کمترین اسکور بھی ریکارڈ ہوا، میچ کے اختتام پر اوڈیسہ کے کپتان نٹراج بیھیرا اور اوڈیسہ کرکٹ ایسوسی ایشن کے سیکریٹری ایسرباد بیھیرا نے میڈیا سے بات میں تصدیق کی کہ وہ خطرناک وکٹ کی باضابطہ شکایت بھارتی بورڈ سے کرینگے۔
انھوں نے استفسارکیا کہ کیا فرسٹ کلاس میچ کیلیے ایسی وکٹ بنائی جاتی ہے؟ یہاں مقابلہ ڈیڑھ دن میں ختم ہوگیا، ہمیں اس پر شدید مایوسی ہوئی، ہم نے اس کی شکایت میچ ریفری شکتی سنگھ سے بھی کی اور اس کی رپورٹ بی سی سی آئی کو بھی بھیجی جائے گی، ناکام سائیڈ پہلی باری میں 107 رنز بنا کر آل آو¿ٹ ہوگئی تھی، عامر غنی نے 6 جب کہ اوجھا اورانوراگ تیواری نے 2،2 کھلاڑیوں کو میدان بدر کیا تھا، فاتح بنگال نے پہلی باری میں 142 اور دوسری کاوش میں 135 رنز جوڑے تھے۔