سڈنی (نیوز ڈیسک ) ہانگ کانگ کے منگ لی کو آسٹریلوی ٹونٹی ٹونٹی بگ بیش لیگ میں شامل کر لیا گیا ہے ، انکے بقول انکی بولنگ میں یوٹیوب پر مایہ ناز کرکٹر شین وارن کی ویڈیوز دیکھنے کے بعد ہی نکھار پیدا ہوا۔ سڈنی سکسرز نے اپنے موسمِ گرما کے کرکٹ کے ایک خصوصی پروگرام کے لیے 24 سالہ کھلاڑی کی خدمات حاصل کی ہیں۔ لِی 2004ءسے کرکٹ کھیل رہے ہیں اور انھوں نے 2010ءمیں گوانگ یو اور 2014ءمیں ایشین گیمز میں انتخاب کے بعد اپنا باقاعدہ آغاز 2010ء میں ہانگ کانگ سے کیا تھا۔ دائیں ہاتھ کے لیگ سپن گیند باز کو کرکٹ کا شوق یوٹیوب پر اپنے پسندیدہ کھلاڑی شین وارن کی ویڈیوز دیکھنے کے بعد پیدا ہوا جسکے بعد لِی نے اپنے پسندیدہ لیگ سپنر کی طرز پر انکے باو¿لنگ ایکشن کی پیروی شروع کی۔ لی کا کہنا تھا کہ وہ ہانگ کانگ کرکٹ ایسوسی ایشن، سڈنی سکسرز اور کرکٹ آسٹریلیا کا شکریہ ادا کرنا چاہتے ہیں کہ انھوں نے انہیں بگ بیش لیگ کھیلنے کا موقع فراہم کیا۔ لی کے مطابق اس مقابلے میں کھیلنے اور اس طرح کے پیشہ وارانہ ماحول کا حصہ بننے سے انکی کرکٹ کی مہارت، معلومات اور تجربے کو بہتر بنانے میں مدد ملے گی۔ 2012ء میں آئی سی سی ورلڈ کپ کوالیفائنگ راو¿نڈ میں جب ہانگ کانگ نے شارجہ میں افغانستان کے خلاف میچ کھیلا تو منگ لی ٹی ٹونٹی کرکٹ کھیلنے والے پہلے چینی کھلاڑی بن گئے تھے۔ آسٹریلوی ڈومیسٹک بگ بیش لیگ 17 دسمبر سے شروع ہوگی ۔