لاہور: (نیوزڈیسک) اسپاٹ فکسنگ کیس میں سزا یافتہ کرکٹرز نے نوجوان کھلاڑیوں کو ان سے سبق سیکھنے کی تلقین کردی ہے۔تفصیلات کے مطابق سابق کپتان سلمان بٹ سمیت اسپاٹ فکسنگ میں ملوث محمد آصف نے گذشتہ روز واپڈا اسپورٹس کمپلیکس میں نوجوان کرکٹرز کو انسدادِ بدعنوانی کے ضابطہ اخلاق پر خصوصی لیکچر دیا۔ اس کا اہتمام واپڈا اسپورٹس بورڈ نے دونوں کرکٹرز کی بحالی کیلیے ترتیب دیے گئے پروگرام کے تحت کیا تھا۔ دونوں کرکٹرز نے گذشتہ ماہ واپڈا ٹیم میں شمولیت اختیار کی تھی۔یہ امر قابلِ ذکر ہے کہ سلمان بٹ اور محمدآصف پاکستان کرکٹ بورڈ کا بحالی پروگرام مکمل کر چکے ہیں، مگرواپڈا نے ڈومیسٹک فرسٹ کلاس کرکٹ میں واپسی سے پہلے ان کی بحالی کیلیے اپنا پروگرام الگ سے تشکیل دیا ہے۔ واپڈا اسپورٹس کمپلیکس میں منعقدہ لیکچر کے دوران فٹنس اور فیلڈنگ اسکیم کے تحت ٹرائلز کیلیے آئے ہوئے نوجوان کرکٹرز سے سلمان بٹ اور محمد آصف نے گفتگو کی۔انھوں نے اپنے تجربات سے آگاہ کرتے ہوئے کہاکہ نوجوان کھلاڑیوں کو اْن کے کیس سے سبق حاصل کرنا چاہیے، پاکستان کرکٹ بورڈ کے انسدادِ بدعنوانی کے تعلیمی پروگرام کی تفصیلات بتاتے ہوئے انھوں نے کہا کہ اْبھرتے ہوئے کھلاڑیوں کو کھیل میں غیرقانونی سرگرمیوں سے دور رہنا چاہیے کیونکہ یہ ان کا مستقبل تباہ کرسکتی ہیں، کھلاڑیوں کو ہمیشہ ملک اور قوم کے وقار اور عزت کے لیے کھیلنا چاہیے۔