لاہور(نیوز ڈیسک) پاکستان کرکٹ بورڈ (پی سی بی) نے مایہ ناز آف اسپنر سعید اجمل کا سینٹرل کنٹرکٹ بحال کرتے ہوئے آئندہ اپنے بیانات میں محتاط رہنے کی ہدایت کردی۔پی سی بی نے سعید اجمل کی جانب سے میڈیا پر آئی سی سی کے خلاف بیان بازی پر شوکاز نوٹس جاری کرتے ہوئے سینٹرل کنٹرکٹ منسوخ کردیا تھا جبکہ انھیں اپنے بیانات کی وضاحت کرنے کوبھی کہا گیا تھا۔ کرکٹ بورڈ نے آف اسپنر سعید اجمل کی جانب سے جمع کروائے گئے جواب کو تسلی بخش قرار دیا.رپورٹس کے مطابق سعید اجمل نے پی سی بی سے اپنے بیانات پر معافی مانگی جس پر انھیں آئندہ محتاط رہنے کی ہدایت کی گئی جبکہ کنٹرکٹ بھی بحال کردیا گیا۔پاکستان کرکٹ بورڈ کی جانب سے سعید اجمل کو بیانات کے حوالے سے ہدایت کی گئی ہے کہ وہ آئندہ احتیاط سے کام لیں۔سعید اجمل نے ایک انٹرویو میں کہا تھا کہ آئی سی سی غیرمنصفانہ طریقے سے اسپنرز کو نشانہ بنارہی ہے جبکہ کئی فاسٹ باؤلروں کا ایکشن اب بھی مشکوک ہے۔سعید اجمل کا کہنا تھا کہ اگر ہندوستانی اسپنر ہربھجن سنگھ کے ایکشن کا صحیح معنوں میں جائز ہ لیا جاتا تو ان کاایکشن بھی 15 ڈگری حد سے تجاوز کررہاہوگا۔سعید اجمل کے باؤلنگ ایکشن کو مشکوک قرار دیے جانے کے بعد انھوں نے اپنے ایکشن کی درستی کے بعد بین الاقوامی کرکٹ میں واپسی کی تھی جو موثر ثابت نہیں ہوئی اور ان کی کارکردگی پر اثر پڑا جس کے باعث انھیں ٹیم سے ڈراپ کردیا گیا تھا۔ٹی ٹوئنٹی میں 85 وکٹیں حاصل کرنے والے سرفہرست باؤلر سعید اجمل کو انگلینڈ کے خلاف ٹی ٹوئنٹی سیریز کے لیے ٹیم میں شامل نہیں کیا گیا ہے جبکہ کپتان شاہد آفریدی نے اپنے ایک بیان میں کہا تھا کہ ورلڈ ٹی ٹوئنٹی کے حوالے سے ہماری تیاریاں تقریبا مکمل ہوچکی ہیں اور عمر اکمل اس ٹیم کاحصہ ہیں لیکن سعید اجمل کے حوالے سے کوئی ذکر نہیں کیا گیا تھا.