پالی کلے(نیوز ڈیسک) سری لنکا کے خلاف 3 ٹیسٹ میچوں کی سیریز کے آخری میچ کے لئے قومی ٹیم نے پالی کلے میں ڈیرے ڈال رکھے ہیں، میچ کل شروع ہو گا۔ ٹیم نے گزشتہ روز پریکٹس سیشن میں بیٹنگ پر خصوصی توجہ دی جب کہ آج بھی بیٹنگ پر ہی زور دیا جائے گا۔ پاکستانی ٹیم کی بیٹنگ دونوں میچوں میں اچھی نہیں رہی۔ دوسرے میں میں ٹیم پہلی اننگز میں صرف 138 رنز پر ڈھیر ہو گئی تھی اور اس کے بعد ٹیم میچ میں کسی بھی لمحے واپس نہ آ سکی۔ قومی ٹیم کے کوچ وقار یونس نے بیٹنگ کوچ گرانٹ فلاورکی ذمہ داری لگائی ہے کہ وہ آج کے پورے سیشن میں صرف بیٹنگ پر توجہ دیں گے۔ دوسرے ٹیسٹ میں پاکستان کے 7 بلے باز تکنیکی غلطیوں کی وجہ سے اپنی وکٹ گنوا بیٹھے تھے۔