لاہور (مانیٹرنگ ڈیسک ،آئی این پی )چیئرمین تحریک انصاف عمران خان کی رہائش گاہ پر جیمرز والی گاڑیاں پہنچا دی گئیں۔ نجی ٹی وی اے آر وائے نیوز کے مطابق سابق وزیراعظم عمران خان کی خصوصی سکیورٹی پر مامور گاڑی ان کی لاہور کے علاقے زمان پارک میں
واقع رہائش گا ہ کے باہر پہنچا دی گئی ہے جبکہ پولیس اہلکار بھی سکیورٹی کیلئے پہنچ گئے۔ عمران خان کی رہائش گاہ کے باہر موجود بیریئرز بھی ہٹا دیئے گئےہیں۔دوسری جانب لاہور ہائیکورٹ نے حلف نامے اور وکالت نامے پر عمران خان کے مختلف دستخط کا نوٹس لے لیا۔ عمران خان کی حفاظتی ضمانت سے متعلق درخواست پر سماعت میں جسٹس طارق سلیم نے عمران خان کے وکیل اظہر صدیق سے مکالمہ کیا کہ ابھی ایک مسئلہ ہے، درخواست، حلف نامے اورآپ کے وکالت نامے پر عمران خان کے دستخط مختلف ہیں، دستخط کیسے مختلف ہوگئے۔ عدالت کے استفسار پر وکیل نے کہا کہ مجھے وقت دیں، دیکھ لیتا ہوں، اس پر عدالت نے کہا کہ آپ ابھی دیکھ لیں،کسی نے یہ فراڈکی کوشش کی ہے، اس میں آپ کویا عمران خان کو توہین عدالت کا نوٹس دوں گا۔ عدالت نے عمران خان کے وکیل کی درخواست واپس لینے کی استدعا رد کرتے ہوئے کہا کہ میں یہ درخواست واپس لینے کی اجازت نہیں دوں گاجب تک یہ معاملہ حل نہ ہوجائے۔ عدالت کے ریمارکس پر ایڈووکیٹ اظہر صدیق نے دستخط مختلف ہونے پر جواب کے لیے وقت مانگ لیا جس پر عدالت نے کہا کہ معاملہ سنجیدہ ہے، نظر انداز نہیں کیا جاسکتا، اس درخواست کو التوا میں رکھ رہے ہیں۔
