اسلام آباد (مانیٹرنگ ڈیسک) آرمڈ فورسز انسٹی ٹیوٹ آف کارڈیالوجی  راولپنڈی کے ڈاکٹروں نے گزشتہ ہفتے کے آخر میں وفاقی وزیر داخلہ رانا ثناء اللہ خان کے دل کے ساتھ جدید ترین پیس میکر کامیابی سے نصب کر دیا ہے۔ پیس میکر درست طریقے سے کام کر رہا ہے اور انہیں آج انسٹی ٹیوٹ سے ڈسچارج کر دیا جائے گا۔ روزنامہ جنگ میں صالح ظافر کی شائع خبر کے مطابق ڈاکٹروں نے

بتایا کہ پیس میکر لگانے سے رانا کے قلبی کام کو بہتر بنانے میں کافی مدد ملی ہے۔ وہ بغیر کسی پریشانی کے عام زندگی گزارنے اور معمول کے مطابق کام کرنے کے لیے آزاد ہوں گے۔ 67سالہ رانا ثناء اللہ کو گزشتہ ہفتے سینے میں تکلیف اور دل کی بے قاعدگی کی شکایت پر اے ایف آئی سی میں داخل کرایا گیا تھا۔ ان کا 19سال قبل لاہور کے ایک اسپتال میں دل کا آپریشن ہوا تھا۔ سرجری کامیاب ہوئی اور اس وقت سے ان کا دل ٹھیک کام کر رہا تھا۔ انہیں پی ٹی آئی حکومت کی جانب سے بھاری مقدار میں منشیات رکھنے کے جعلی کیس میں جیل بھیج دیا گیا تھا۔ انہیں لاہور جیل میں قید تنہائی میں سخت گرمی کے موسم میں رکھا گیا تھا لیکن انہوں نے دور سے بھی اس کی شکایت نہیں کی۔ جیل میں انہیں ادویات دینے سے انکار کر دیا گیا تھا حالانکہ ان کے ڈاکٹروں اور جیل کے ڈاکٹروں نے انتظامیہ سے کہا تھا کہ وہ انہیں بہت زیادہ ضروری ادویات فراہم کریں۔ اس کے بعد سے وہ عارضہ قلب کا شکار ہوگئے۔ انہیں ہفتے کے آخر تک اپنا کام دوبارہ شروع کرنے کی اجازت دی گئی ہے۔ ان کے اصرار پر انہیں اے ایف آئی سی کے عام وارڈ میں داخل کرایا گیا۔ اس سے قبل ہفتے کے روز آپریشن تھیٹر میں لی گئی اپنی تصویر کے پس منظر میں اپنے آڈیو پیغام میں انہوں نے کہا تھا کہ وہ ٹھیک ہیں اور اتوار کو گھر واپس آجائینگے۔