ممبئی (این این آئی)جنوبی بھارت سے تعلق رکھنے والی نامور اداکارہ نین تارا اور وگنیش شوم کے ہاں جڑواں بچوں کی پیدائش متنازع بن گئی، تامل ناڈو کی حکومت نے بچوں کی پیدائش سے متعلق والدین سے وضاحت طلب کرلی۔ نیانتھارا نے اپنے مداحوں کو اس وقت سرپرائز کردیا

جب انہوں نے اپنے ہاں جڑواں بچوں کی پیدائش کا اعلان کیا۔ انہوں نے سوشل میڈیا پر بچوں کی تصاویر بھی شیئر کی تھیں۔تاہم نین تارا کے ہاں بچوں کی پیدائش سے متعلق یہ قیاس آرائیاں کی جارہی ہیں کہ ان کے ہاں بچے سیروگیسی کی مدد سے پیدا ہوئے ہیں۔ ماہرین قانون کا ماننا ہے کہ بھارت میں رواں برس جنوری سے سیروگیسی کی مدد سے بچوں کی پیدائش پر پابندی عائد کردی گئی ہے، تاہم کچھ مخصوص صورتحال میں اس کی اجازت دی گئی ہے۔ ان قیاس آرائیوں پر ریاست تامل ناڈو کے وزیر صحت ایم سْبرامنیئم نے ردِ عمل دیتے ہوئے کہا ہے کہ ریاستی حکومت اس معاملے میں نین تارا اور وگنیش سے وضاحت طلب کرے گی۔ واضح رہے کہ مداحوں کی جانب سے قیاس آرائیاں نین تارا اور وگنیش کی شادی کی تاریخ کو لے کر سامنے آئی تھیں کیونکہ یہ جوڑا رواں برس 9 جون کو شادی کے بندھن میں بندھا تھا۔ایک پریس کانفرنس کے دوران جب تامل ناڈو کے وزیر صحت سے سوال کیا گیا کہ وہ جوڑا جس کی شادی 4 ماہ قبل ہوئی ہو، وہ سیروگیسی کی مدد سے بچوں کی پیدائش کرواسکتا ہے؟ کیا اس کے لیے وقت کی کوئی حدد مقرر ہے؟ جس پر انہوں نے جواب دیا کہ ڈائریکٹوریٹ آف میڈیکل سروسز اس معاملے کی تحقیقات کرے گا اور ان دونوں سے جواب بھی طلب کیا جائے گا۔ دوسری جانب مختلف میڈیا رپورٹس میں یہ دعویٰ بھی کیا جارہا ہے کہ اس جوڑے کے ہاں سیروگیسی کی ہی مدد سے جڑواں بچوں کی پیدائش ہوئی ہے، تاہم ان اسٹارز نے اس سلسلے میں باضابطہ اعلان نہیں کیا۔