اسلام آباد (این این آئی)وزیر داخلہ رانا ثنا اللہ نے کہا ہے کہ پی ٹی آئی والے ریڈزون یا ڈی چوک کی طرف بڑھیں گے تو موثر علاج کریں گے، حکومت نے فتنے اور فساد کو روکنے کی تیاری کرلی ہے،عمران خان مخالفین کیلئے نامناسب الفاظ استعمال کرتے ہیں،

ان سے کوئی بات نہیں ہوسکتی، ملک کا ایک تہائی سیلاب میں ڈوبا ہوا ہے، مشکل سے نکلنے کے لیے اقدامات کررہے ہیں۔وزیرداخلہ راناثنا اللہ نے اپنے ایک بیان میں کہا ہے کہ پی ٹی آئی قانون کے مطابق پور امن احتجاج کرناچاہے تو تحفظ فراہم کریں گے، تاہم چیئرمین پی ٹی آئی عمران خان سے کوئی بات نہیں ہوسکتی، عمران خان مخالفین کیلئے نامناسب الفاظ استعمال کرتے ہیں۔انہوں نے کہا کہ سیلاب اور بارشوں سے ایک تہائی ملک پانی میں ڈوبا ہوا ہے، جس سے ملک بھر میں اس وقت ساڑھے 3کروڑ لوگ بے گھر ہیں۔ رانا ثنااللہ نے کہا کہ ہم اس وقت اس مشکل سے نکلنے کے لیے اقدامات کررہے ہیں، موجودہ صورتحال میں نئے انتخابات کیسے ہوسکتے ہیں ؟۔انہوں نے کہا کہ پی ٹی آئی والے ریڈزون یا ڈی چوک کی طرف بڑھیں گے تو موثر علاج کریں گے، حکومت نے فتنے اور فساد کو روکنے کی تیاری کرلی ہے۔