اسلام آباد/لاہور( این این آئی)وفاقی تحقیقاتی ایجنسی ( ایف آئی اے) نے قومی اداروں کے خلاف ہرزہ سرائی کیس میں 60 کنگ ٹرولرز کے خلاف تحقیقات شروع کردیں، 25 کے خلاف مقدمات درج جبکہ 19 کو گرفتار کرلیا گیا۔نجی ٹی وی کے مطابق وفاقی تحقیقاتی ادارے نے ٹرولنگ میں ملوث 19 افراد کو گرفتار کرلیا گیا، گوجرانوالہ میں 17 انکوائریز، 9 مقدمات درج ہوئے، زیادہ تر گرفتاریاں گوجرانوالہ سرکل میں کی گئیں۔ 6 کیسز فیصل آباد سرکل میں درج کئے گئے، 2 ٹرولز کو لاہور سے گرفتار کیا گیا، اسلام آباد میں 8 انکوائریز رجسٹرڈ کی گئیں۔ذرائع کے مطابق لاہور میں 10 ٹرولرز کے خلاف کیس درج کئے گئے۔ وزارت داخلہ نے قومی اداروں کیخلاف ہتک آمیز مہم پر ٹرولرز کے خلاف کارروائی کی خصوصی اجازت دی تھی۔