کراچی(این این آئی) سندھ اسمبلی میں اپوزیشن لیڈر حلیم عادل شیخ نے الزام عائد کیاہے کہ مجھے سیاسی انتقام کا نشانہ بنایا جارہا ہے اور بلاول ہائوس میں قتل کی سازش تیار ہورہی اور آصف زرداری اس سازش کے ماسٹرمائنڈ ہیں، قتل کی سازش سے متعلق چیف جسٹس کو خط لکھ رہا ہوں

مجھے کچھ ہوا توآصف زرداری،بلاول بھٹو،مراد علی شاہ پرمقدمہ درج کیاجائے۔بدھ کو جاری بیان میں حلیم عادل شیخ نے کہاکہ آصف زرداری گرفتار کرکے جیل میں جرائم پیشہ افراد کے ذریعے قتل کرانا چاہتے ہیں۔انہوں نے کہاکہ مجھے بجٹ سے متعلق روکناٹارگٹ ہے، بجٹ کے بعد میں ان کے ہاتھ آیا تو مجھے قتل کردیا جائے گا، بے نظیر بھٹو یہاں ہوتیں تو یہ سب کچھ نہ ہوتا۔حلیم عادل شیخ نے کہا کہ اینٹی کرپشن کو استعمال کرکے سندھ میں یہ سب کچھ ہورہا ہے ، سندھ اسمبلی میں اورمیرے گھر پر جو ہوا شرمناک ہے ، یہ غلام ہیں ڈونلڈ لو کی پیداوار ہیں۔حلیم عادل شیخ نے کہا کہ ضمانت کے باوجود پولیس مجھے گرفتار کرنا چاہ رہی ہے، گزشتہ روزسے مشکوک گاڑیاں میری سوسائٹی کے باہر گھوم رہی ہیں۔انہوں نے کہاکہ کچھ دن بعد میری بیٹی کی شادی ہے، شادی کی تیاریوں کے سلسلے میں گھر پر موجود تھا۔حلیم عادل شیخ نے کہا کہ اینٹی کرپشن کو  مجھے گرفتار کرنے کا ٹاسک دیا گیا ہے، پورے کراچی کے اینٹی کرپشن کے افسران کو میرے پیچھے لگایا گیا۔انہوں نے کہاکہ گزشتہ روز سندھ اسمبلی کا بجٹ بھی پیش کیا گیا اورمجھے

بجٹ اجلاس میں شرکت سے روکنے کی کوشش کی جارہی ہے، گزشتہ برس بھی بجٹ اجلاس میں تقریر کرنے کا موقع نہیں دیا گیا۔انہوں نے کہا کہ مجھے سیاسی انتقام کا نشانہ بنایا جارہا ہے،

میں سندھ کے عوام کے آواز اٹھاتا ہوں اس لئے مجھے دبانے کی کوشش کی جارہی ہے۔حلیم عادل شیخ نے کہا کہ عمران خان کا سپاہی ہوں امپورٹڈ حکومت سے نہیں ڈروں گا، یہ سیاہ رات ختم ہونے والی ہے سب سے حساب لیں گے۔