عازمین حج کو سبسڈی دینا جائز ہے یا ناجائز، اسلامی نظریاتی کونسل کا موقف سامنے آ گیا
اسلام آباد (این این آئی)اسلامی نظریاتی کونسل نے کہا ہے کہ عازمین حج کو سبسڈی دینے میں شرعاً کوئی حرج نہیں۔
اسلامی نظریاتی کونسل کی جانب سے جاری اعلامیے میں کہا گیا ہے کہ سوشل میڈیا پر اسلامی نظریاتی کونسل سے متعلق حج سبسڈی کی مخالفت کے حوالے سے خبریں حقائق کے منافی ہیں۔
اعلامیے میں کہا گیا کہ گزشتہ حکومت نے اسلامی نظریاتی کونسل سے حج سبسڈی کے متعلق سوال کیا تھا جس کا جواب وزارت مذہبی امور کو ارسال کر دیا تھا۔
اسلامی نظریاتی کونسل کے اعلامیے میں کہا گیا کہ شرعاً حکومت کی طرف سے حج پر سبسڈی دینا جائز ہے، سبسڈی میں کوئی حرج نہیں اور یہ عمل حجاج کے صاحب استطاعت ہونے کے منافی نہیں ہے،
یہ سبسڈی بلاتفریق دی جائے، چاہے کوئی سرکاری طور پر حج کرے یا پرائیویٹ طور پر حج کے لیے جائے۔اسلامی نظریاتی کونسل نے کہا کہ حکومت زکوٰۃکی رقوم سے حج سبسڈی دینے سے احتیاط برتے تو زیادہ بہتر ہے تاہم شرعی طور پر حکومت کی طرف سے عازمین حج کے لیے سبسڈی دینے میں کوئی حرج نہیں ہے۔
