لاہور( این این آئی) مسلم لیگ (ن) کے رکن اسمبلی اشرف رسول کی جانب سے سیکرٹری پنجاب اسمبلی محمد خان بھٹی، سیکرٹری کوارڈی نیشن عنایت اللہ لک اور ڈائریکٹر جنرل پارلیمانی امور رائے ممتاز کے خلاف مقدمہ درج کروایا گیا ۔مقدمہ تھانہ شاہدرہ میں درج کروایا گیا۔

مقدمے کے متن میں کہا گیا ہے کہ گزشتہ روز صبح 10بجے 5 افراد گاڑی پر میرے گھر آئے۔محمد خان ،عنایت اللہ لک اور رائے ممتاز پستول سے مسلح تھے، 2 نامعلوم افراد کے ساتھ میرے گھر میں داخل ہوئے، محمد خان، عنایت اللہ اور رائے ممتاز نے مجھ پر پستول تان لئے۔ایف آئی آر کے متن میں کہا گیا ہے کہ محمد خان نے کہا کہ آپ میرا پیچھا چھوڑ دیں،آپ میری مخالفت سے باز نہ آئے تو جان سے مار دوں گا۔محمد خان کے دیگر 4 ساتھیوں نے بھی مجھے سنگین نتائج کی دھمکی دیں اور واپس چلے گئے۔انہوں نے بتایا کہ مقدمے میں نامزد محمد خان بھٹی نے ضلع منڈی بہائو الدین اور دیگر علاقوں سے من پسند لوگوں کی بھرتیاں کیں جس پر پنجاب اسمبلی میں آواز بلند کر رکھی ہے۔مقدمے کے اندراج کے بعد ڈی جی پارلیمانی امور رائے ممتاز کو اسی مقدمے میں گرفتار کیا گیا جبکہ سیکرٹری اسمبلی محمد خان بھٹی اور سیکرٹری کوارڈی نیشن عنایت اللہ لک کے گھر پر بھی چھاپہ مارا گیا ۔

موضوعات:لاہور پولیس