دیربالا(این این آئی)دیر کوہستان میں ہائی ایس گاڑی کھائی میں جاگری جس کے نتیجے میں 10 افراد جاں بحق اور 16 افراد زخمی ہوگئے، جن میں بعض کی حالت نازک ہے جس کے باعث ہلاکتوں میں اضافے کا خدشہ ہے ۔ پولیس کے مطابق حادثہ اپر دیر کے علاقے پاتراک چالال کے مقام پر پیش آیا

، حادثے کی شکار وین مردان سے کلکوٹ جا رہی تھی کہ راستے میں حادثے کا شکار ہوکر کھائی میں جاگری جس کے نتیجے میں دس افراد جاں بحق اور متعدد زخمی ہوگئے جاں بحق ہونے والوں میں خواتین اور بچے بھی شامل ہیں۔ذرائع کے مطابق زخمیوں میں بھی 4 افراد کی حالت تشویشناک ہے۔حادثے کی اطلاع ملتے ہی اہل علاقہ نے اپنی مدد آپ کے تحت امدادی کارروائیاں میں حصہ لیا بعدازں پولیس اور ریسکیو کی ٹیمیں بھی جائے حادثہ پر پہنچیںاور زخمیوں اور لاشوں کو ڈسٹرکٹ ہسپتال دیر منتقل کیا گیا۔ہسپتال انتظامیہ کے مطابق مرنے والوں میں تین خواتین اور دو بچے شامل ہیں۔ پولیس کے مطابق زخمیوں کے بیان میں پتہ چلا ہے کہ ہائی ایس مردان سے کلاکوٹ جارہی تھی کہ راستے میں پاتراک چالال کے مقام پر حادثے کی شکار ہو گئی۔دوسری جانب وزیر اعلی محمود خان نے حادثے میں قیمتی انسانی جانوں کے ضیاع پر اظہار افسوس اور تعزیت کی ہے، اور اسپتال انتظامیہ کو زخمیوں کو بہترین طبی امداد فراہم کرنے کی ہدایت کی ہے۔