لاہور(این این آئی)پاکستان مسلم لیگ (ن) کے صدر شہبازشریف نے نئے سال پر اہل وطن کے لئے دعااور نیک تمناؤں کا پیغام دیتے ہوئے کہا ہے کہ یا اللہ آنے والے
تمام سال پاکستان اور دنیا کے لئے امن، سلامتی اور خیروبرکت کے سال ہوں۔ اپنے بیان میں انہوں نے کہا کہ نوازشریف کی قیادت میں 2022 میں جناح کا پاکستان بنانے کی فیصلہ کن جدوجہد کا آغاز کریں گے،قوم سے وعدہ کرتے ہیں کہ ان شااللہ انہیں معاشی تباہی، مہنگائی اور بے روزگاری سے نجات دلائیں گے،2022 میں قوم کو نئی امید، نیا حوصلہ اور نئی روشن منزل کی نوید دیں گے اور بہتری کی طرف لے کر جائیں گے۔انہوں نے کہا کہ اذیتوں، دکھوں اور مہنگائی کا ایک اور سال تمام ہوا،قوم کی زندگی میں ان تلخیوں کا غم ہے، نئے سال پر عہد کریں کہ ہم بابائے قوم کے اتحاد، تنظیم اور یقین محکم کے زریں اصولوں پر کاربند ہوں گے،دعا ہے کہ 2022 اور اس کے بعد آنے والے برسوں میں کشمیر، فلسطین اور مقبوضہ خطوں کے عوام کو آزادی کی نعمت میسرآئے۔
