کراچی (این این آئی)قومی کرکٹ ٹیم کے سابق کپتان شاہد آفریدی نے کہا ہے کہ وہ کبھی بھی بابر اعظم کو کپتان بنانے کے حق میں نہیں رہے ہیں تاہم بابر نے اپنی پرفارمنس سے انہیں غلط ثابت کردیا ہے۔44 سالہ شاہد آفریدی نے نجی ٹی وی چینل

پر انٹرویو میں کہا کہ میں بابر کو کپتانی جیسی بڑی ذمہ داری سونپنے کے حق میں کبھی بھی نہیں رہا ہوں۔یاد رہے کہ بابر اعظم کو اکتوبر 2019 میں سرفراز احمد کی جگہ پاکستان کا ون ڈے اور ٹی ٹوئنٹی کپتان مقرر کیا گیا تھا ،ایک سال بعد انہیں ٹیسٹ ٹیم کی باگ ڈور بھی سونپی گئی تھی۔بابر اعظم کو کپتان بنائے جانے کے وقت ماہرین کی رائے تھی کہ بابر اعظم میں قائدانہ صلاحیتیں موجود نہیں ہیں تاہم کپتان نے اپنی حالیہ پرفارمنس سے ناقدین کو خاموش کروادیا۔بابر اعظم کی قیادت میں پاکستان نے یو اے ای میں ہونے والے آئی سی سی ٹی 20 ورلڈ کپ میں اپنے تمام گروپ میچز جیت کر سیمی فائنل تک رسائی حاصل کی، ٹورنامنٹ میں یہ کارنامہ انجام دینے والی واحد ٹیم تھی۔اس کے بعد گرین شرٹس نے بنگلہ دیش کو T20 اور ٹیسٹ سیریز دونوں میں وائٹ واش کیا۔