مریم نواز کی ایک اور آڈیو لیک ہو گئی

21 دسمبر‬‮ 2021 |

اسلام آباد(مانیٹرنگ ڈیسک /این این آئی)پاکستان مسلم لیگ ن کی نائب صدر مریم نواز سے منسوب ایک اور آڈیولیک ہوگئی جس میں وہ کہہ رہی ہیں کہ دیکھی پھر میری میڈیا مینجمنٹ ۔۔۔جیو نیوزاور دنیا نیوز نے ان کی جئی تئی پھیر دی ہے۔خیال رہے کہ اس سے قبل مریم نواز کی میڈیا کو کنٹرول کرنے کے حوالے سے متعد د آڈیوز سامنے آچکی ہیں جس کا انہوں نے اعتراف بھی کیا ہے کہ

یہ انہی کی آڈیو ہے ۔ قبل ازیں وفاقی دارالحکومت اسلام آباد میں پریس کانفرنس میں صحافی کی جانب سے جب مریم نواز کی پرانی آڈیو سے متعلق سوال کیا گیا تو اس پر مریم نواز شریف کا کہنا تھا کہ میں یہ نہیں کہوں گی کہ میری آڈیو کو جوڑ توڑکر پیش کیا گیا، میں اعتراف کرتی ہوں کہ وہ میری ہی آڈیو ہے اور وہ میں نے ہی کہا تھا۔انہوں نے اس بات کا بھی اعتراف کیا کہ میں ن لیگی دور میں ان کا سوشل میڈیا چلا رہی تھی اور میں نے ہی سما ٹی وی اور اے آر وائی کے اشتہارات بند کرنے کا حکم دیا تھا۔دوسری جانب پاکستان مسلم لیگ (ن) کی ترجمان مریم اورنگزیب نے مریم نوازکی آڈیو سے متعلق وضاحت کرتے ہوئے کہا ہے کہ مریم نواز کی گفتگو پارٹی اشتہارات سے متعلق تھی، یہ ایک پرانی ویڈیو ہے جس پر مریم نواز نے جرات کے ساتھ سچ بولا۔ اپنے بیان میں انہوںنے کہاکہ پارٹی اشتہار سے متعلق فیصلہ پارٹی ہی کرتی ہے،انہوں نے اس وڈیو کو مانا کیونکہ اس میں چھپانے والی کوئی بات تھی ہی نہیں ۔ انہوں نے کہاکہ جب کچھ غلط نہ کیا ہو تو اسی طرح کھل کر اعتراف کیا جاتا ہے ،اس آڈیو پر طوفان برپا کرنے کی ضرورت نہیں،اصل معاملے سے توجہ ہٹائی نہیں جاسکتی،اس آڈیو کا جواب دیں جس نے بائیس کروڑ عوام کو مہنگائی، بے روزگاری کے جہنم میں دھکیل دیا،اس آڈیو کا جواب دیں جس کی وجہ سے معیشت کا کباڑا ہوا اور قوم کا ووٹ چوری کرکے کٹھ پتلیاں مسلط کی گئیں ،اس آڈیو کا حساب دیں جس سے عدل کے ایوان کے ماتھے پر داغ لگ گیا ہے۔