کراچی (این این آئی) پاکستان پیپلز پارٹی پارلیمنٹیرینز کی مرکزی اطلاعات سیکریٹری و رکن قومی اسمبلی شازیہ عطا مری نے وزیراعظم کی تقریر پرردعمل دیتے ہوئے کہا کہ ایم کیو ایم اور پی ٹی آئی نے مل کر کراچی کو ماموں بنانے کی کوشش کی اور وزیر اعظم جھوٹوں کے

سردار ہی نہیں، پگ دار بھی ہیں۔ انہوں نے حکومت سے سوال کرتے ہوئے کہا کہ کیا عمران خان حکومت نے کل کراچی کی بجلی 4 روپے فی یونٹ مہنگی نہیں کی؟ اور وفاق اربوں روپے کراچی سے جمع کرتا ہے مگر کراچی کو کتنے میگا پروجیکٹ دیے گئے ہیں ۔ شازیہ مری نے کہا کہ عمران خان اور مودی کا کراچی کے لیے پلان یکساں ہے جبکہ ماس ٹرانزٹ کو جنگلا بس کہنے والے کو فیتا کاٹتے ہوئے شرم سے مر جانا چاہیے تھا۔ انہوں نے مزید کہاکہ وزیر اعظم کے حلقے کے لوگ کراچی علاج کروانے آتے ہیں اور وہ ہیلتھ کارڈ کے بھاشن دے رہے ہیں، عمران خان خیبرپختونخواہ میں کوئی ایک ہسپتال بتا دیں جہاں دل کے مریض مفت علاج کروا سکتے ہوں جبکہ تین سال سے میانوالی تلہ گنگ روڈ نہ بنا پایا مگر دعوہ ہے پاکستان کو لندن بنانے کا۔ شازیہ مری نے کہا کہ وزیر اعظم کرونا فنڈ کے 40 ارب کا حساب دیں،دیکھنا یہ ہوگا کہ کرونا فنڈ میں کئی حلیمہ خان کا کوئی لینا دینا تو نہیں ۔مرکزی اطلاعات پیپلز پارٹی نے کہا کہ وزیر اعظم نے کراچی آنے سے پہلے ہمیں بجلی قیمت میں 4 روہے اضافے کا ایک بار پھر تحفہ دیا۔