اسلام آباد (این این آئی)مشیر خزانہ شوکت ترین نے کہا ہے کہ حکومت اقتصادی ترقی کو تیز کرنے کے لئے اصلاحاتی اقدامات متعارف کرانے کے لئے پرعزم ہے۔ان کاکہنا تھا کہ آئندہ چار ماہ بعد پاکستان پائیدار ترقی کے راستے پر گامزن ہو جائے گا، مشیر شوکت ترین نے پاکستان بزنس کونسل کے زیر اہتمام ’’معیشت پر مکالمہ 2021ء‘‘ سے کلیدی خطاب میں حکومت کی اقتصادی ترجیحات پر روشنی ڈالی ۔
شوکت ترین نے کہاکہ حکومت اقتصادی ترقی کو تیز کرنے کے لئے اصلاحاتی اقدامات متعارف کرانے کے لئے پرعزم ہے، مشیر خزانہ نے کہاکہ اسٹریٹجک ترجیحات، کاروبار میں سہولت کاری، سرمایہ کاری کے مواقع، محصولات اور اخراجات کے منصوبوں کا واضح روڈ میپ ہے، اعلیٰ جامع اور پائیدار ترقی کی بنیاد رکھی جائے تاکہ معیشت کسی بھی صورتحال کو برداشت کر سکے۔ شوکت ترین نے کہاکہ دانشمندانہ مالیاتی اصلاحات نے ٹیکس ٹو جی ڈی پی کے تناسب کو بہتر بنانے اور محصولات کی پیداوار کو بہتر بنانے میں مدد کی ہے، ٹیکس کی وصولی میں اضافہ اور ٹیکس کی بنیاد کو بڑھانا حکومت کے مالیاتی ایجنڈے کے اہم مقاصد تھے۔ مشیر خزانہ نے برآمدات کو فروغ دینے کے لئے ترجیحی شعبوں جیسے زراعت، آئی ٹی اور صنعت کی جدید کاری کی نشاندہی کی۔ مشیر خزانہ نے کہاکہ غیر ملکی سرمایہ کاری کو راغب کرنے کے لیے خصوصی اقتصادی زونز قائم کئے گئے ہیں، حکومت ملک میں برآمدات پر مبنی صنعت کاری کو فروغ دینے کے لئے “میک ان پاکستان” پالیسی پر بھرپور طریقے سے عمل پیرا ہے۔مشیر خزانہ نے سماجی تحفظ کے پروگراموں کے ذریعے پسماندہ افراد کی مدد کے لئے اٹھائے گئے اقدامات پر بھی روشنی ڈالی۔ شوکت ترین نے کہاکہ اقدامات کا مقصد معاشرے کے کمزور طبقات کو بااختیار بنا کر ان کے معیار زندگی کو بہتر بنانا ہے۔ انہوںنے کہاکہ مالی سال 2022ء میں جی ڈی پی ہدف سے زیادہ بڑھے گی اور درمیانی مدت میں اس کی رفتار برقرار رہے گی۔
