لاہور(این این آئی)ترجمان پنجاب حکومت فیاض الحسن چوہان کی جانب سے ترین گروپ کے ارکان سے رابطے کا انکشاف ہوا ہے ۔میڈیا رپورٹ کے مطابق حکومت پنجاب نے اپنے ناراض ساتھیوں کو منانے کے لئے نئی حکمت عملی اپنا لی اور پنجاب حکومت کے ترجمان فیاض الحسن چوہان کو ترین گروپ کو منانے کے حوالے سے اہم ٹاسک دیا گیا ۔ذرائع کا کہنا ہے کہ فیاض الحسن چوہان نے ترین گروپ کے عبدالحئی دستی اور سردار خرم لغاری سے رابطہ کیا ہے، اور ان سے جلد ہی ملاقات بھی کریں گے۔ذرائع کے مطابق فیاض الحسن چوہان وزیر اعظم اور وزیراعلی پنجاب کی ہدایت پر ترین گروپ سے رابطے کر رہے ہیں، ان ارکان کو رابطوں کے ذریعے پارٹی ڈسپلن کا پابند بنایا جائیگا، اور ان کے علاقائی مسائل کو ترجیحی بنیادوں پر حل کیا جائیگا ، فیاض الحسن چوہان ترین گروپ کے دیگر ارکان سے بھی مرحلہ وار رابطہ کریں گے۔