اسلام آباد (این این آئی)پی آئی اے کا ایک خصوصی طیارہ دوبارہ کابل سے مسافر لے کر واپس پاکستان پہنچا، پرواز صبح 7 بجے کابل سے اسلام آباد کے ہوائی اڈے پر پہنچی ۔ پی آئی اے کے ترجمان عبداللہ خان کی طرف سے جاری اعلامیہ کے مطابق سکیورٹی وجوہات کی
بنیاد پر اس پرواز کی واپس روانگی تک معلومات محدود رکھی گئیں، پرواز کیلئے پی آئی اے انتظامیہ افغان حکومت و سول ایوی ایشن اور نیٹو حکام کے ساتھ لمحہ بہ لمحہ رابطے میں رہی اور پی ائی اے کے سچوئیشن روم سے سی ای او پی آئی اے ارشد ملک براہ راست آپریشن کی نگرانی کر رہے تھے۔ ترجمان نے کہا کہ مواصلاتی نظام کے استعمال سے پی آئی اے انتظامیہ، عملے اور زمین پر موجود سکیورٹی اداروں کے ساتھ منسلک رہی اور وزیر اعظم پاکستان و دیگر اعلی حکومتی عہدیداران کو بھی مطلع رکھا گیا، پرواز میں پاکستانیوں، غیر ملکی سفارتی مشن اور اہم عالمی اداروں کے لوگوں کو ریسکیو کیا گیا ہے۔ مسافروں کی ائیرپورٹ تک رسائی و اجازت نامے کے لئے پی آئی اے کے کابل میں موجود زمینی عملے نے انتظامات کئے، سی ای او پی آئی اے ارشد ملک و دیگر اعلی انتظامیہ پرواز کے استقبال کیلئے خود ائیرپورٹ پر موجود تھے۔ انہوں نے اس اہم پرواز کو آپریٹ کرنے والے عملے کو شاباش دی اور مسافروں کو خوش آمدید کہا۔ مسافروں نے بھی پی آئی اے کے عملے کے جذبے اور محنت کو سراہا ہے۔
